A Xustiza confirma que unha sobriña de Fraga foi enchufada pola Valedora do Pobo

Milagros Otero abusou do seu poder para colocar indebidamente a María Puy Fraga nun posto, confirma o Tribunal Supremo, poñendo así de novo no disparadeiro á polémica Valedora do Pobo, cuxa dimisión leva meses reclamando a oposición e a quen o PPdeG amagou no seu día con deixar caer

O Tribunal Supremo rexeita o recurso interposto polo Valedor do Pobo á sentenza que anulou o nomeamento de María Puy Fraga, sobriña do expresidente Manuel Fraga e irmá do portavoz parlamentario do PPdeG Pedro Puy, para un posto na defensoría galega, do que foi apartada pola titular da institución, Milagros Otero, tras coñecerse o primeiro fallo xudicial.

Otero, no centro, durante o seu comparencia no Parlamento para explicar o nomeamento

A a Sala do contencioso administrativo do Tribunal Superior de Xustiza de Galicia (TSXG) estimou o recurso dun dos participantes no proceso de selección, a diario de libre designación, do posto de xefe de servizo de Administración e Persoal, que recaeu nesta persoa, coa que Otero garda relación.

O alto tribunal galego considerou probado que a valedora influíu no proceso para que o posto recaese en María Puy Fraga, filla do catedrático de Dereito do que é discípula académica Otero, quen, segundo o TSXG, actuou con "arbitrariedade" e cometeu un "desvío de poder".

MARCHA ATRÁS
Tras coñecerse o fallo xudicial en xuño de 2018, Otero revogou o nomeamento de María Puy Fraga para executar de forma inmediata a sentenza, que posteriormente foi recorrida. Ademais, compareceu o 5 de xullo no Parlamento de Galicia, onde se desvinculou do nomeamento, anulado por "desvío de poder". "O adxunto asinou o recibín coa resolución de abstención, na que se menciona a consecuencia legal diso, é dicir, que era el quen debía resolver sobre o asunto", argumentou en sede parlamentaria.

Deste xeito, defendeu que ela se "abstivo", aínda non sendo preceptivo neste caso, de participar no procedemento, aínda que o fixo unha vez definidos os criterios da convocatoria e de que se presentasen os candidatos. Tamén sinalou ao seu adxunto, Pablo Cameselle, nome proposto polo PSOE para ese posto, como a persoa que resolveu o proceso.

Otero dixo, en sede parlamentaria, que na resolución de abstención "non especificou a causa concreta, debido a que consideraba que era de público coñecemento que é discípula académica do pai dunha das persoas que concorría".

IMPÓN ATA 2.000 EUROS DE COSTAS
O fallo do Supremo, con data do 28 de marzo deste ano, inadmite a trámite o recurso prsentado polo Valedor do Pobo por "carencia de interese casacional, sen que se aprecie no escrito de preparación a formulación dun problema xurídico que transcenda do cariz marcadamente casuístico que presenta o litixio".

Impón ao Valedor do Pobo as costas procesuais, ata unha cifra máxima de todos os conceptos de 2.000 euros en favor da parte recorrida e acudida.