Fiscal pide prisión permanente por Diana Quer
No caso da moza á que presuntamente tamén tentou secuestrar pídenlle outros quince anos de prisión
O Ministerio Fiscal solicita a imposición da pena de prisión permanente revisable para José Enrique Abuín Gey, alias 'O Chicle', polo secuestro, agresión sexual e asasinato de Diana Quer, cuxo rastro se perdeu na Pobra do Caramiñal (A Coruña) en agosto de 2016.
Así o recolle o escrito de acusación presentado ante o Xulgado de Instrución número 1 de Ribeira, que a semana pasada deu por pechada a instrución deste caso.
En concreto, Fiscalía considera a Abuín Gey culpable dos delitos de detención ilegal e agresión sexual, polos que pide penas de 20 e 12 anos de prisión. A maiores, atribúelle o asasinato con aleivosía e ensañamiento de Diana Quer, polo que reclama, do mesmo xeito que a acusación particular que exercen os pais da moza, a prisión permanente revisable. Ao mesmo tempo, solicita unha indemnización para os familiares de 290.000 euros.
APERTURA DO XUÍZO SOBRE O OUTRO CASO
Este escrito de acusación coñécese o mesmo día no que transcendeu que o Xulgado de Instrución número 2 de Ribeira (A Coruña) acordou a apertura de xuízo oral contra 'O Chicle' por o intento de rapto e de agresión sexual a unha moza de Boiro (A Coruña).
O caso, ocorrido no nadal de 2017, precipitou a resolución da desaparición de Diana Quer, cuxo cadáver foi localizado días despois de que Abuín Gey fose detido por este caso e, dado que era sospeitoso do crime da moza madrileña, acabase confesando a súa implicación na morte.
No procedemento polo que agora se abre xuízo oral, Abuín Gey está acusado dun delito de detención ilegal ou, alternativamente, un delito consumado de coaccións, así como un intento de agresión sexual, un roubo con violencia e intimidación en grao de tentativa, un delito de ameazas e outro de lesións. A Fiscalía solicita que sexa condenado a 15 anos e dez meses de cárcere e ao abono dunha indemnización de 15.750 euros, ou alternativamente, doce anos e dez meses.
Escribe o teu comentario