Se tes problemas con ABANCA, a Unión de Consumidores de Galicia dáche estes consellos

Miguel López Crespo, secretario xeral de UCGAL, atende a Galiciapress para explicar a situación na que se atopan os afectados, que pasos teñen que tomar os usuarios antes de reclamar e os problemas aos que se están enfrontando os consumidores.


|

Miguel López Crespo, secretario xeral de UCGAL, atende a Galiciapress para explicar a situación na que se atopan os afectados, que pasos teñen que tomar os usuarios para reclamar e os problemas aos que se están enfrontando os clientes de ABANCA.


Abanca1


Na Unión de Consumidores de Galicia, a situación pilloulles, como a todos, de improviso. Despois dunha reunión de urxencia, Miguel López Crespo, secretario xeral do organismo, puido apuntar que, aínda que de momento non teñen ningún tipo de explicación sobre os motivos que causaron o fallo informático que ten a ABANCA practicamente paralizada desde hai 24 horas, o principal erro agora da empresa é “a falta de información”.


“O primeiro é como nos expomos a xestión desta crise, porque en termos temporais falamos de 24 horas e a entidade non está a informar debidamente nin aos consumidores, nin aos medios, nin aos organismos...”, sinala López Crespo. Sobre as causas deste apagamento case total nos servizos da entidade bancaria, López Crespo admite que de momento ninguén se puxo en contacto con eles para explicarlles debidamente a situación. “A Unión de Consumidores de Galicia realmente non sabe o que está a pasar, e creo que o resto de entidades tampouco”, asume o secretario xeral.


CAUSAS INTERNAS OU EXTERNAS?

O máis preocupante é a falta de información e transparencia neste caso, porque non hai forma de saber se o fallo responde a cusas internas ou externas, porque pode deberse a un fallo xeral dos servidores ou a un ataque informático”, expoñen desde a Unión de Consumidores, recalcando que os dous casos “son moi distintos o un do outro”.


“Isto é como se vas a unha oficina do banco e dinche que non che poden atender. Pois é importante saber o motivo polo que non che poden prestar o servizo, porque non é o mesmo que non che atendan porque non hai luz que non che atendan porque está a atracar o banco”, explica López Crespo.


Hoxe en día todo se fai polos servizos electrónicos: no móbil, desde o computador…isto agrava máis se cabe o problema, porque deixa aos usuarios máis desprotexidos, e con todo apenas ofrecen información e cando o fan, como en Twitter, é moi cuestionable e fano nun intervalo demasiado grande de tempo”, critican desde UCGAL, quen se expón se ABANCA e os seus servizos informáticos e de atención ao cliente “están realmente preparados para facer fronte a un problema destas dimensións e para solucionalo”.





Doutra banda, ABANCA, nas poucas comunicacións que fixo a través das redes sociais, informou de que devolvería todas as comisións aos usuarios que se viron obrigados a retirar o diñeiro noutros caixeiros, algo que UCGAL considera “o mínimo que poden facer nesta situación”.


QUE PODEN FACER OS USUARIOS?

Ante semellante aluvión de incidencias, o secretario xeral de UCGAL dixo que a prioridade agora da entidade era “deixar constancia clara de todos os problemas que están a suceder e das repercusións negativas que están a ocasionar aos usuarios”.


Aínda que esta mañá os teléfonos de UCGAL non pararon de soar, López Crespo comentou que a maioría dos usuarios chamaban para realizar “consultas”. “Este é o problema, que os usuarios están desconcertados pola situación, non só polos problemas que lles está ocasionando, senón porque a propia entidade bancaria non lles está proporcionando a información que necesitan”, lamentou o secretario xeral, que aproveitou para diferenciar que “aínda que hai usuarios que teñen problemas particulares, por exemplo os que nos chaman porque non poden comprar entradas para un espectáculo, logo están outros con problemas máis espiñentos, como os que teñen que pagar un recibo ou a cota de autónomo, por exemplo”.


Nas próximas horas seguramente empecen a chegar reclamacións e desde UCGAL o primeiro que recomendan é “rexistralo todo”. “Se o caixeiro non funciona pode facerlle unha fotografía, se non pode acceder á banca online faga un pantallazo, se lle notifican que non poden cobrar un recibo ou unha compañía non pode ofrecerlle un servizo por esta situación, rexístreo e documénteo da forma que sexa”, aconsella López Crespo, porque todo ese material “irá acompañado xunto á reclamación para apoiala”.


SITUACIÓN INÉDITA

Preguntado sobre se os usuarios tiñan algún tipo de precedente ao que agarrarse, López Crespo destacou que esta situación é totalmente “inédita”. “Entendemos que é un caso totalmente inusual e o máis preocupante é a falta total de información e como pode afectar os usuarios, porque entendemos que poida darse o caso de que nunha oficina dunha localidade pois non funcione o servizo informático ou que un caixeiro quede inoperativo, pero despois de 24 horas…é algo que para os usuarios resulta inadmisible”, comentou López Crespo.


No momento no que se está escribindo está información, o servizo da banca online segue inoperativo e desde as redes sociais non emitiron máis información desde as 8:00 horas.

relacionada Protestas contra ABANCA ante o apagamento de oficinas, caixeiros, app e banca electrónica

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal - Política de Cookies - Política de Privacidade - Configuración de cookies - Consello editorial - Publicidade
Powered by Bigpress
CLABE