Folga en ambulancias "non só polos nosos dereitos, senón polos de todos"

A Xunta ao rebaixar os prezos de contrátalos e a patronal ao "bloquear" o convenio condenan ás ambulancias do 061 a unha situación límite, argumentan os traballadores para convocar unha folga que pronto pode ser indefinida

Os sindicatos acusan a Xunta de precarizar as condicións dos contratos, sen ter en conta o custo real, e de inhibirse agora que as empresas pretenden reducir os soldos un 10 %

Unha pasada protesta dos traballadores

Este venres, 8 de febreiro, comeza en Galicia a folga das ambulancias, que se desenvolverá en tres tramos: do 8 ao 11 e do 18 ao 24 de febreiro e do 4 ao 10 de marzo. A partir de 28 de marzo, se non houber acordo, o paro será indefinido. 

Segundo explican os sindicatos, o motivo da convocatoria é o bloqueo das negociacións do cuarto convenio do transporte sanitario, que leva tres anos caducado. Trátase dun colectivo de máis de mil traballadores e traballadoras que agora, ademais de seguir coas súas condicións conxeladas, ven como as empresas pretenden acometer un "brutal" recorte dos soldos.

QUE PASARÁ A PARTIR DE FEBREIRO?

Os sindicatos Comisións Obreiras, UXT e CIG denuncian que as empresas do sector concorreron aos concursos públicos e que a Xunta os licitou «sen ter en conta o custo real do servizo». Crítica que tamén lle fai a patronal ao goberno. 

Agora, tras concorrer con ofertas baixas, como non son capaces de sacarlle rendemento ou deixar de acumular perdas, as empresas pretenden unha redución salarial do 10 %,. Os sindicatos critican o ultimatum das compañías, "a ameaza de deixar de pagar a partir de 31 de marzo", advertencia que tamén implica deixar de traballar para a Xunta.

RISCO PARA A SAÚDE DAS SÚAS FAMILIAS

O comité de folga denuncia que se trata dun sector con moita precariedade e no que as empresas, en moitos casos, non cumpren aquilo ao que están obrigadas por lei. Aseguran que con frecuencia o persoal hai máis de 50 horas extras ao mes —"sen cobrar ou mal pagas"—, non se respectan os dereitos a descanso ou vacacións, falta persoal ou non se encargan da desinfección de uniformes, «poñendo en risco a nosa saúde e a das nosas familias».

A precariedade dos concursos públicos «prexudica o propio servizo», inciden, e relatan que hai ambulancias en que chove dentro, ambulancias e bases sen a debida limpeza e desinfección, vehículos deteriorados e con avarías sen solucionar e ata «falta de material para realizar a función, que hai que coller nos hospitais porque moitas empresas non o poñen».

CRÍTICA AO GOBERNO

Por último, desde o comité de folga culpan a Xunta de Galicia de permitir esta situación, antepoñendo os beneficios das empresas á correcta prestación do servizo público, e lembran que «nunha ambulancia pode ter que ir calquera persoa. Por isto, non só loitamos polos nosos dereitos, senón polos de calquera que algún día precise empregar un elemento básico no sistema sanitario galego».