Nin ERC nin Bildu queren a Beiras en "Agora Repúblicas"

|

Os socios do Bloque Nacionalista Galego (BNG) na coalición para as eleccións europeas, EH Bildu e Esquerra Republicana de Catalunya (ERC), tamén dan por pechada a candidatura das forzas soberanistas de esquerda para a cita coas urnas do 26 de maio e, por tanto, desatenden o ofrecemento efectuado por Anova para a súa incorporación ao proxecto.


Presentación da candidatura de BNG, ERC e EH Bldu para as europeas
"Respectamos a posición do BNG", sinalou o candidato de EH Bildu, Josu Juaristi, durante a presentación da candidatura 'Agora Repúblicas', celebrada este venres en Santiago de Compostela.

Tras o rexeitamento expresado o pasado xoves pola líder frontista, Ana Pontón, ao ofrecemento efectuado polo histórico dirixente nacionalista e referente de Anova, Xosé Manuel Beiras; vascos e cataláns puxéronse ao lado dos seus socios galegos e pechan a porta á incorporación de Anova, partido xurdido tras a ruptura do BNG en 2012.

BEIRAS, QUE SE MARCHOU DO BLOQUE, QUERE PRESENTARSE XUNTO AO BNG
O pasado mércores, na súa reaparición pública despois de meses de silencio, Xosé Manuel Beiras --líder do BNG durante dúas décadas-- abrazaba a proposta efectuada polo coordinador xeral de EH Bildu, Arnaldo Otegi, na que apostou por crear unha alianza para as xerais que fose "do PNV á CUP".

Beiras manifestou o seu agrado pola proposición e chamou a iniciar conversacións para a incorporación de Anova na candidatura das forzas independentistas vascas, catalás e galegas para as eleciones europeas do 26 de maio.

ERC PREFIRE ASENTIR CO SILENCIO
Pero Pontón pechaba a porta o pasado xoves nunhas declaracións nas que pediu "seriedade" a Beiras, xa que, segundo a líder frontista, non existe ningunha proposta sobre a mesa.

A postura do Bloque foi apoiada polos seus socios na candidatura. Josu Juaristi matizaba que, coa súa proposta, Arnaldo Otegi non pretendía "inmiscirse nas cuestións de Galicia". "O meu maior respecto á posición de Bloque", engadiu o político vasco.

Pola súa banda, a representante de ERC no acto, Diana Riba, non quixo intervir, co que deu por boa a postura expresada por EH Bildu e BNG.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress