“Os GES teñen que funcionar para emerxencias, non para as cacicadas dos alcaldes”

Primitivo Gándara, presidente de AGESGA - asociación de traballadores de os GES (Grupo de Emerxencias Supramunicipais)- conversa con Galiciapress sobre o accidente mortal en Begonte. Entende que se puido incorrer nun delito de omisión de socorro. Tamén denuncia que os concellos utilizan persoal de Protección Civil para labores que non lles corresponden, como asfaltado ou limpeza.

Membros de Protección Civil

O pasado 25 de novembro faleceu un traballador na localidade lucense de Begonte ao quedar atrapado debaixo dunha furgoneta. Aínda que ao lugar do accidente desprazaron persoal do corpo de bombeiros e servizos sanitarios, nada se puido facer por salvar a vida do home. 

Quen non acudiron á escena foron os membros do GES de Guitiriz que, a pesar de estar obrigados de atender todas as emerxencias, por unha serie de neglixencias non formaron parte do dispositivo. Primitivo Gándara, presidente de AGESGA, asociación que agrupa a todos os GES galegos, sinala que, segundo as informacións das que dispón, “quen atendeu á chamada non foi un GES, foi un membro do goberno municipal”.

“Os domingos non hai ninguén na central e o que parece é que un concelleiro levou o teléfono a casa, e esa persoa que tería que atender a chamada non se puxo en contacto cos GES”, comenta Primitivo, que advirte que ao suceder isto incórrese nun delito de “omisión de socorro”. “Cando firmas o contrato estás obrigado a estar dispoñible 24 horas ao día todos o día do ano para atender ás emerxencias, pero eles non o atenderon”, lamenta o presidente de AGESGA.

Esta situación xa foi denunciada pola CIG, que considerou este feito como “moi grave”, ao tratarse de “unha xestión imprudente e neglixente”. Primitivo non descarta que este caso désese noutras ocasións no servizo de Guitiriz, “pero afortunadamente non se chegou a estes extremos, e isto ao ter consecuencias maiores xa sinala todas as deficiencias que rodean a este operativo”, destacando que “probablemente déronse outros casos con feridos leves nos que non acudiron os GES”.

CONFLITOS COA ALCALDESA

Na nota emitida hai uns días pola asociación sinálase que este GES de Guitiriz contaba no pasado cun persoal de 12 membros e agora é de 8 pero que, por diversos motivos, só traballan 6. Primitivo subliña que só operan 6 porque “un está de baixa de longa duración e outro está apartado do seu posto de traballo”. “O motivo débese a un conflito entre este traballador e a alcaldesa (Regina Polín, PSdeG) que o despediu o último día do contrato de proba. O traballador decidiu denunciala e a sentenza saíu favorable a el ao tratarse dun despedimento nulo, obrigando á alcaldesa para readmitilo, pero ela recorreu a sentenza ante o Tribunal Superior de Xustiza”, afirma Primitivo, sobre o caso do traballador apartado do seu emprego.

“Neste tempo a alcaldesa non acatou a sentenza e o traballador acudiu aos xulgados para regular a súa situación e cando a alcaldesa chamou ao traballador díxolle que prefería pagarlle pero sen que acudise ao seu posto de traballo”, asegura o presidente da asociación, quen á súa vez destaca que todo isto failles entender que a persoa á fronte do concello de Guitiriz “está a pasar do servizo e busca a súa desintegración, promovendo un mal funcionamento e por non contratar xente, e encima a xente que ten non a deixa acudir ao traballo”. “Está malversando un diñeiro público”, censura Primitivo.

GES ASFALTANDO ESTRADAS

A propia asociación tamén denuncia que os GES de Guitiriz realizan labores que non lle corresponden, como asfaltado ou limpeza de estradas, co risco que iso supón ao non atender a emerxencias reais, algo que, segundo Primitivo, “non se dá en todos os GES, pero se nalgúns puntuais”. 

“Hai alcaldes que cren que este servizo pode utilizarse para todo tipo de labores, algo que se foi continuando no tempo en pleno século XXI, onde non temos un servizo de emerxencias ao 100% porque temos alcaldes que seguen malversando este servizo”, lamenta Primitivo, que asevera que “o servizo de emerxencias ten que funcionar para as emerxencias, non para as cacicadas do alcalde”

Para solucionar isto, Primitivo propón “que se abran unhas bases de concurso ou oposicións para cousas para vías e obras e que contraten a persoal cualificado, que deixen de usar os GES para os seus caprichos”. Desde o consistorio de Guitiriz xa procederon a desmantelar a central dos GES para 2019. “Agora mesmo están a estudar se o GES de Guitiriz (que opera noutro municipios da Terra Cha) pode pasar o seu central a outra localidade”, aínda que sinala o presidente de AGESGA que as alianzas entre as distintas alcaldías están zancadilleando esta posibilidade.

Desde AGESGA tamén lamentan que estas deficiencias débense a que en moitos GES “hai moita falta de medios que terán que ir repoñéndoo aos poucos”. “Estamos a traballar para consolidar isto, aínda que sexa a contagotas, para que nos doten de medios eficientes para poder atender de forma correcta a todas as emerxencias”, sentencia o presidente da entidade.