Medalla para o policía que salvou a dous menores de morrer afogados

O policía Ignacio Fernández Sánchez recibiu este luns a Medalla Bronce ao Mérito con distintivo vermello de Protección Civil por socorrer e salvar mentres estaba fóra de servizo a dous menores de idade arrastrados mar dentro nunha praia da Coruña.

Así mesmo, o menor Luca Álvarez Toribio, que conseguiu salvar a vida da súa nai grazas a unha chamada ao 112, ou o bombeiro falecido nas inundacións de Málaga deste ano, José Gil Gutiérrez, foron algúns dos 53 condecorados coas medallas ao Mérito de Protección Civil 2018, nun acto celebrado este 26 de novembro na sede da Escola Nacional de Protección Civil (ENPC) en Madrid, presidido polo ministro do Interior, Fernando Grande-Marlaska.

Estes recoñecementos premian a distintas persoas e colectivos que, pola súa traxectoria e actividade profesional ou por actuacións concretas, superaron o nivel de esixencia regulamentaria e contribuíron a prestiXiar as funcións de Protección Civil.

En total, impuxéronse un total de 53 condecoracións que recoñecen a cidadáns e colectivos as súas actuacións en favor de "unha Protección Civil máis eficaz e solidaria, que redunde en beneficio dos cidadáns, e na que debemos ser capaces todos de traballar con xenerosidade e gran dose de compromiso", como subliñou o ministro.

Entre as condecoracións, destaca o recoñecemento póstumo (Ouro con distintivo vermello, a título póstumo) ao bombeiro José Gil Gutiérrez, que perdeu a vida en acto de servizo o pasado 20 de outubro, e cuxo traballo serviu para "construír esa seguridade humana" da que a sociedade "está tan necesitada", como dixo Grande-Marlaska, para quen a actuación dos condecorados demostra que existe "unha sociedade solidaria e chea de valores", valores que fixeron posible a Constitución, como apostilou.

As condecoracións tamén quixeron poñer en valor a importancia da incorporación dunha cultura da prevención nas escolas como demostra o caso do pequeno Luca, quen con 4 anos salvou a vida á súa nai cunha chamada ao 112 de Castela e León (premiado co Ouro con distintivo vermello).

Tamén se recoñeceu (Bronce con distintivo azul) aos adolescentes estremeños Aitor González Domínguez e Sergio Lasso Dionisio, alumnos do Instituto Norba Caesarina de Cáceres, por salvar a vida a un compañeiro tras practicarlle os primeiros auxilios, e a Judith Muriel Gómez, alumna do mesmo centro, por salvar a vida a unha muller tras practicarlle a técnica de reanimación RCP.