O programa de Cineuropa 2018 desafía á censura

Santiago de Compostela vivirá como cada ano un mes de novembro marcado polo cinema. A trixésimo segunda edición de Cineuropa promete ser "de escándalo", pois unha das seccións deste ano fará un repaso das películas que ao longo da historia sufriron polémicas polas súas temáticas ou tiveron que facer fronte á censura.

As salas e teatros da capital galega volverán encherse do mellor da sétima arte nunha nova edición do festival, que se desenvolverá entre o 7 e o 28 de novembro e qu recoñecerá as traxectorias de Ángela Molina, Isaki Lacuesta e Antonio Durán 'Morris', premios Cineuropa 2018.

A 32ª edición do certame foi presentada este mércores no Pazo de Raxoi polo alcalde de Santiago, Martiño Noriega, e o director do festival, José Luis Losa; que estiveron acompañados pola vicepresidenta da Deputación da Coruña, Goretti Sanmartín, e o e director xeral de Políticas Culturais, Anxo Lorenzo.

'A noite de doce anos' do realizador uruguaio Álvaro Brechner é a cinta elixida para dar o pistoletazo de saída ao festival santiagués, unha cita "de referencia" e "moi esperada" polos composteláns, segundo definiu Martiño Noriega, que destacou que na capital galega "novembro relaciónase co cinema".

Máis de 300 películas repartidas en 21 seccións serán proxectadas nos 21 días que durará o certame, que chegará a espazos como o Teatro Principal, o Salón Teatro, a sede Afundación, Numax, o Auditorio de Galicia e os multicines Compostela. Como novidade, este ano o festival expándese ao Centro Cívico de Santa Marta e ao Museo das Peregrinacións, que tamén acollerán proxeccións. Os abonos e entradas, que por primeira vez poderán ser adquiridas por Internet, estarán á venda para partir do martes 6.

EDICIÓN "DE ESCÁNDALO"

Se o pasado ano o 'leit motiv' elixido foi o cinema sobre revolucións e conflitos sociais, en 2018 Cineuropa opta polo "escándalo". Os promotores do festival seleccionaron máis de cincuenta filmes que, como 'A laranxa mecánica' de Stanley Kubrick, 'O último tango en París' de Bertolucci ou 'A última tentación de Cristo' de Scorsese, levantaron bochas na sociedade das súas épocas.

En palabras do director do festival, José Luis Losa, o obxectivo da sección 'Escándalo: Cinema sen lei nen mordazas' é abrir un debate entre o público sobre a transgresión e os límites morais que marcan as sociedades e os poderes fácticos, e como isto foi evolucionando ao longo do último século da historia do cinema e a humanidade.

E é que, como destacou Losa, Cineuropa descarta situarse nunha posición de "equidistancia" porque "a idea de compromiso" é un dos obxectivos que se "priorizan" á hora de seleccionarse as películas que conforman un certame que definiu como "democrático" e "cunha función social moi clara".

O director sinalou que o festival compostelán aspira en próximas edicións a converterse nunha cita "competitiva", algo que "non puido ser" este ano pero que confía en que se dea na edición de 2019.

SECCIÓN OFICIAL

Un total de 35 filmes formarán parte da Sección Oficial Europea do festival, que quedará aberta o 8 de novembro coa exhibición de 'Entre dúas augas', película de Isaki Lacuesta que se fixo coa Cuncha de Ouro na última edición do Zinemaldia de Donosti.

Por esta sección desfilará unha selección das películas máis aplaudidas do circuíto de festivais no último ano, así como os últimos traballos de "vellos coñecidos" de Cineuropa como os realizadores Florian Henckel, Lászlo Nemes ou Paolo Sorrentino, que traerá a Compostela 'Papagaio', un 'biopic' do expresidente italiano Silvio Berlusconi.

Tamén haberá lugar na sección oficial para novos cineastas como o francés Louis Garrel (gañador 'ex aequo' do premio ao mellor guión en San Sebastián), Alisa Berger, Adina Pitilie ou Yann González.

OUTRAS SECCIÓNS

A sección internacional estará composta por 26 cintas, entre a que se inclúe 'A flor', a última película do realizador arxentino Mariano Linás, que xerou unha gran expectación a nivel mundial pola súa duración: máis de 13 horas.

Ademais, Cineuropa dá continuidade a programas xa explorados en anteriores edicións, como 'LatidoAmericano', 'Fantastique Compostela', 'Docs Cineuropa', 'Panorama Audiovisual Galego', 'Cult Movies' e a súa clásicos 'Película Sorpresa' e maratón, que se celebrará o xoves 22 e venres 23, respectivamente.

Así mesmo, incorpora a o programa novidades como a sección 'O presente é muller', na que se proxectarán unha serie de películas realizadas por mulleres nos últimos dous anos; unha retrospectiva sobre os 100 anos do cinema de Romanía e un repaso pola etapa do guionista Rafael Azcona en Italia.