Admitido un recurso contra o número 2 de Baltar por "incompatibilidade de funcións" do secretario municipal

O Alcalde de Monterrei, Luís Suárez Martínez

O Xulgado do Contencioso Administrativo número 2 de Ourense admitiu a trámite o recurso interposto polo grupo municipal Veciños de Monterrei contra o alcalde do municipio, José Luis Suárez Martínez, por presunta incompatibilidade de funcións do secretario municipal. Suárez tamén é secretario da Deputación, o número dous no organismo que dirixe Manuel Baltar.

Segundo o grupo municipal, o secretario de Monterrei "posúe intereses directos en empresas que foron contratadas de forma regular e frecuente polo Concello", feitos que denunciou en Pleno municipal e ante a Fiscalía Provincial de Ourense. Desde o grupo instaron o alcalde a trasladar ao Ministerio de Facenda e Función pública a denuncia efectuada contra o funcionario, "algo  o que José Luis Suárez negouse nun acordo adoptado o pasado 18 de abril", expoñen. 

O secretario municipal formaría parte, segundo explica Veciños de Monterrei, como socio e conselleiro dunha empresa mercantil á que o concello contrataría o aluguer de vehículos e a reparación de utilitarios da súa titularidade. A pesar de que, segundo expón o grupo, a Fiscalía non observou indicios penais no asunto denunciado, "podería ser obxecto de incompatibilidade". 

A portavoz de Veciños de Monterrei, Carmen Soa, destacou que "o incumprimento das normas sobre incompatibilidades pode ser castigado coa separación do servizo, suspensión de funcións ou traslado". Soa esixe "responsabilidades políticas" ao alcalde de Monterrei.