A Xunta defende á actual mineira de Touro

O director xeral de Enerxía e Minas, Bernardo Tahoces, asegurou que a Xunta "cumpre coa legalidade" e controla "en todo momento", con "compromiso e responsabilidade", a administración do proxecto mineiro -que pretenden reabrir Atalaya Minning e Cobre San Rafael- e a situación ambiental na actual mina abandonada -agora canteira- en Touro e O Pino (A Coruña).

Actual sitio da mina en Touro

DEBATE NO PARLAMENTO
Así o expresou este venres durante a súa comparecencia na Comisión 6ª de Industria, Enerxía, Comercio e Turismo do Parlamento galego, na que respondeu a preguntas do deputado do PSdeG Antón Losada, quen manifestou a "oposición" do seu grupo á explotación.

Neste sentido, Tahoces defendeu o papel do Goberno autonómico neste ámbito "sempre co máximo respecto á lei", á vez que afirmou que desde o ano 2013 os niveis de PH nos ríos Ulla, Lañas e Brandelo son "normais". "Non podemos dicir o mesmo dos ríos Pucheiras e Felisa, iso xa o sabemos", declarou.

O PSOE CRE QUE A CONTAMINACIÓN É INSUSTENTABLE
En concreto, segundo lembrou o director xeral, o control por parte da Administración autonómica parte dun convenio asinado en 2002 entre a Universidade de Santiago de Compostela (USC), a Consellería do Medio Ambiente e Augas de Galicia, polo cal se pretendía restaurar a calidade da auga dos ríos afectados pola explotación.

Con todo, Losada tachou a situación ambiental de "dramática en termos gráficos". "Non dubido dos datos do nivel de PH en determinados arroios, pero en termos ambientais aquilo é totalmente insustentable para elaborar unha opinión pública favorable cos proxectos mineiros", esgrimiu.

IMAXES "DURAS E DIFÍCILES"
E é que o deputado socialista ve "difícil de crer e de aceptar" que Augas de Galicia vexa normal a situación da zona, porque, segundo as súas palabras, hai "imaxes duras e difíciles".

A iso, Tahoces respondeu que "gustará máis ou menos a recuperación e restauración da zona, pero está a facerse desde un punto de vista ambiental". "Desde un punto de vista visual non gusta a case ninguén", admitiu.

Así as cousas, o portavoz do PSdeG na comisión lamentou que a situación en Touro e O Pino atópase "enormemente degradada", polo que pediu que as esixencias públicas "sexan as máximas". "É unha historia de fracaso de control das administracións", sentenciou.

Bernardo Tahoces no Parlamento