Folgas en decembro no transporte en autobús na Coruña
#CIG, UXT e CCOO anunciaron a convocatoria de catro xornadas de folga para este mes de decembro no transporte de viaxeiros e viaxeiras por estrada da provincia da Coruña en resposta á parálise na negociación e en demanda dun convenio colectivo "digno".
Segundo concretaron, o calendario de paros, acordado polas asembleas de traballadores e traballadoras "de forma unánime", dará comezo este venres, día 5, continuará o 12, 15 e 19 e "afectará a todo o servizo, excepto á Compañía de Tranvías da Coruña xa que dispón de convenio propio".
Engaden que "para darlle máis visibilidade ás súas reivindicacións", o vindeiro venres o persoal tamén se mobilizará diante das estacións de autobús da Coruña, Santiago de Compostela e Ferrol.
Así mesmo, as organizacións sindicais sinalan que "no caso de non producir avances na negociación", despois de Nadal formularán a convocatoria dunha folga de carácter indefinido. "Até lograr un convenio digno, con subidas salariais decentes e unha mellora real nas condicións de traballo", expoñen.
Escribe o teu comentario