A matriz de R aumenta o seu beneficio máis dun 10%

Bos resultados trimestrais para a operadora vasca Euskatel, que reparte dividendos tras culminar a compra da asturiana Telecable e da galega R Cable.

O Grupo Euskaltel rexistrou un beneficio neto de 14,6 millóns de euros no primeiro trimestre, o que supón un incremento do 10,9% respecto ao mesmo período do exercicio anterior, mentres que os ingresos creceron un 26,6% ata alcanzar os 176,6 millóns, segundo informou este xoves á Comisión Nacional do Mercado de Valores (CNMV).

A compañía, que en xullo de 2017 formalizou a compra de Telecable tras adquirir en 2015 o operador galego R, comunicou que gaña clientes en todos os seus negocios --telefonía fixa e móbil, banda ancha e televisión--, e crece en ingresos e rendibilidade tras culminar "a consolidación dos operadores do norte".

O beneficio bruto de explotación (Ebitda) experimentou un crecemento do 23,8%, superando os 84,2 millóns nos tres primeiros meses do ano, e cunha marxe sobre ingresos do 47,7%.

Pola súa banda, o Cash Flow Operativo alcanzou os 50,3 millóns de euros, o que representa un crecemento do 12,3% sobre o exercicio precedente, cunha marxe sobre ingresos do 28,5%, que ascendería ao 31,5% sen considerar o plan de expansión do Grupo.

A compañía destacou que, como resultado, o beneficio neto no primeiro trimestre deste ano ascende a 14,6 millóns de euros, un 10,9% superior ao do primeiro trimestre do exercicio anterior no que aínda non estaba integrado Telecable. Pola súa banda, os ingresos do Grupo creceron un 26,6%, ata alcanzar os 176,6 millóns no primeiro trimestre.

CLIENTES
Os clientes de Euskaltel, R e Telecable superan os 2,3 millóns de produtos contratados, o que supón un incremento de 25.000 novos contratos no último trimestre.

Así mesmo, a compañía destacou a súa evolución que confirma a "tendencia positiva" do último trimestre cun crecemento do 2,5%, ata alcanzar os 49,3 millóns de ingresos neste período.

Edificio de R Cable na Grela / Nemigo wikipedia

Ademais, subliñou que a carteira de clientes de alto valor engadido con contratos de 3 e 4 produtos segue crecendo, alcanzando xa o 68,6% sobre o total de clientes. Os clientes contratan unha media de 3,6 produtos por usuario.

Por outra banda, apuntou que se deu un "récord de penetración de todos os produtos sobre a base de clientes". En concreto, en banda ancha chégase ao 85,4% e crece 44 puntos básicos, en móbil lógrase un 78,9%, cun aumento de 177 puntos básicos, e en TV de pago fíxase a penetración nun 69,3%, cun incremento de 97 puntos.

No primeiro trimestre lográronse 18.000 novas liñas de telefonía móbil ata alcanzar as 933.000 liñas. Pola súa banda, a Televisión de pago aumenta en máis de 6.000 novos clientes no trimestre, chegando a ao redor dos 400.000 usuarios.

Pola súa banda, a contratación de produtos de banda ancha crece en máis de 3.000 no primeiro trimestre, ata alcanzar os 492.000 usuarios. En relación á telefonía fixa apunta que se volven a rexistrar altas netas positivas, "confirmando a tendencia positiva anunciada no anterior trimestre".

O grupo destacou que iniciou "con éxito" a súa expansión en Navarra, coa apertura do seu primeiro punto de venda e onde xa conta cos seus primeiros clientes.

DIVIDENDO
Por outra banda, respecto da política de remuneración ao accionista do Grupo, o Consello de Administración propuxo distribuír aos accionistas un dividendo final de 27,8 céntimos de euro por acción con cargo aos resultados de 2017 en base ao beneficio neto do exercicio, que deberá ser aprobado pola Xunta Xeral de Accionistas convocada para o próximo 1 de xuño.

Este dividendo de 27,8 céntimos de euro por acción implica unha rendibilidade do 3,9% sobre a cotización media do último mes de 2017 e equivale a un pay-out do 100% do beneficio neto consolidado.

O Consello de Administración acordou distribuír un dividendo a conta de 12,7 céntimos de euro por acción, equivalentes a 22,7 millóns de euros, pago que se liquidou o pasado 1 de febreiro. O dividendo complementario, de 15,1 céntimos de euro por acción, proposto polo Consello de Administración, deberá ser aprobado na próxima Xunta Xeral de Accionistas.