Os sindicatos da folga xustiza acampan diante da Xunta

A presión dos traballadores no conflito da Xustiza non baixa, a pesar da dimisión do presidente do comité. Ademais de seguir ao Vicepresidente a moitos dos seus actos, desde esta mañá os funcionarios acampan en San Caetano.

A nova medida de presión do comité de folga dos funcionarios da Administración de Xustiza de Galicia, en folga desde hai 76 días, consiste nunha acampada ante San Caetano, a sede central dos servizos da Xunta.

A acampada reivindicativa prodúcese despois dunha nova rotura das negociacións entre ambas as partes a semana pasada, o que orixinou que o pasado sábado o comité de folga, integrado polos sindicatos SPJ USO, Alternativas na Xustiza CUT, UXT, CSIF, STAJ, CIG e CC.OO., rexistrase un novo escrito no que solicitaba á Xunta a "inmediata convocatoria" da mesa de negociación para retomar o diálogo.

Así mesmo, o pasado sábado sóubose que o presidente do comité de folga e representante de SPJ-USO, Manuel Tejada, renunciou a ese posto, cando están a piques de cumprirse dous meses e medio de folga, e tras romper as negociacións o pasado mércores. Na convocatoria dos sindicatos difundida para este luns recoñecíase que pretenden unha "demostración de unidade do comité".