108 positivos en alcol ao volante ​en Ourense durante o mes de marzo, 13 deles en accidentes

Das 7.762 probas de alcoholemia que levou a cabo o Subsector de Tráfico da Garda Civil de Ourense no mes de marzo, 108 foron positivas. 13 destas probas detectáronse en accidentes de circulación, sete na comisión de infraccións e 88 en controis preventivos. 

Segundo informou Tráfico, á súa vez, 24 deses infractores foron postos a disposición xudicial como investigados pola suposta comisión dun delito contra a seguridade viaria, xa que a cantidade de alcol inxerida arroxaba unha taxa superior a 0,60 miligramos por litro de aire expirado.

En relación cos controis de detección de drogas, Tráfico destacou que se realizaron 155 probas, con resultado positivo o 30 por cento de elas. Iso, asegura Tráfico, "pon de manifesto un notable aumento do consumo de drogas durante a condución".

Por iso, a Agrupación de Tráfico da Garda Civil intensifica este tipo de controis, co fin de "retirar da circulación a aqueles condutores que poñen en perigo a súa vida e a dos demais usuarios das estradas", abunda.

A sanción por conducir con alcol ou drogas no organismo é de mil euros e seis puntos menos no carné, lembra Tráfico. No caso de que sexa constitutivo de delito, a pena é de prisión de tres a seis meses ou multa de seis a 12 meses ou traballos en beneficio da comunidade de 31 a 90 días, e en calquera caso, a de privación do dereito para conducir vehículos a motor e ciclomotores por tempo superior a un e ata catro anos.

O Subsector de Tráfico da Garda Civil de Ourense fai un chamamento "á responsabilidade dos condutores, para que non se poñan ao volante cando inxerisen drogas ou alcol".