Cruce de reproches en Pontevedra polas comilonas pagadas con diñeiro de todos

|

Loreslouzan


Os gastos en viaxes ou comidas dos políticos colócanse cada pouco no punto de mira, cuestionando ata quá punto responden o protocolo ou supoñen un abuso de quen xestiona o diñeiro público. Un novo episodio desta polémica salpica estes días a provincia de Pontevedra.


Os protagonistas, Lores e Louzán. O PP de Pontevedra respondeu este sábado ás acusacións do secretario provincial do PSOE de Pontevedra, Santos Héctor, quen acusou este venres ao expresidente da Deputación Rafael Louzán de gastar en 2008 un total de "9.000 euros" da institución nunha cea no Hotel Ritz de Madrid.


O Partido Popular xustifica que na cea "participaron 200 persoas, entre elas operadores de turismo nacionais e internacionais, e xornalistas". "E por tanto, o prezo do prato roldaba os 50 euros", apostilou.


A continuación, precisou que esta cea formaba parte das diferentes accións que o anterior goberno provincial, encabezado por Rafael Louzán, levou a cabo en 2008 en Fitur, ano no que tamén contou, relatou, cunha 'caseta' propia na feira para todos os concellos da provincia, por iso é polo que se fala, defendeu o PP, dun "gasto de 400.000 euros".


"Naquel momento, a Xunta do bipartito apenas tiña espazo na feira para dar resposta á estratexia que seguía a Deputación, que era relanzar a marca Rías Baixas", relatou o PP. Santos Héctor recriminou que ese gasto incluía a viaxe a Madrid, a citada cea, e noites de hotel "para os deputados e consortes", entre outros gastos.


3.000 EUROS EN NOVA YORK


Mentres, na cidade de Pontevedra o portavoz do grupo municipal do PP, Jacobo Moreira, asegurou que lle parece "unha indecencia, un insulto, rirse de todos os pontevedreses, gastar 3.000 euros nun capricho do señor Lores".


Nesta cea, celebrada en maio de 2015, á que Miguel Anxo Fernández Lores convidou a empresarios e personalidades de orixe pontevedresa que residen actualmente en Nova York, gastáronse 3.276,76 dólares (2.916 euros ao cambio daquel momento) e nel participaron 27 comensais.


Os populares criticaron que o alcalde dese a propina que "considerou oportuna", que foi de 506,50 dólares (452 euros), o 20% sobre o custo da cea --antes de impostos-- (2.532 dólares), seguindo o estándar marcado pola sociedade estadounidense.


O PP de Pontevedra esixe ao alcalde unha "desculpa" porque "os cidadáns non merecen un alcalde que trata con tanto desprezo os fondos públicos", e reclaman que as viaxes anunciadas polo BNG para o primeiro trimestre deste ano se publiquen na páxina web, tanto a axenda institucional coma o custo detallado de todas estas viaxes.


PALETADA


Pola súa banda, o alcalde, Miguel Anxo Fernández Lores, ademais de "agradecer" ao Partido Popular por "volver poñer de actualidade" que a cidade de Pontevedra recibiu un premio en Nova York "pola súa excelencia polo deseño saudable", recomendou aos populares que "viaxen un pouquiño máis e que se deixen de paletadas, porque iso que están a expor é unha auténtica paletada".


Lores sinala que a cea se celebrou nun establecemento de comida grega chamado Molyvos, situado na Sétima Avenida, no baixo do hotel Wellington, onde precisamente estaba hospedada a delegación Pontevedra que viaxou a Nova York a recoller o premio concedido pola fundación do exalcalde Michael Bloomberg.


"Celebrámolo con algúns pontevedreses que están en Nova York", apunta, e puntualiza que cada veciño que asistiu á entrega dese premio pagou 150 dólares. Polo que cualifica a cea como un "acto razoable" de agradecemento.


En canto ao "retorno" que aquel premio tivo para a cidade do Lérez, Fernández Lores informa de que "onte mesmo" (polo xoves) chegou unha invitación tamén do Centro para o Deseño Activo de Nova York na que: "Póñennos como referencia para a recuperación da cidade de Nova Orleans", arrasada despois da catástrofe do Katrina. "Queren inspirarse en Pontevedra para a súa recuperación", apostila o alcalde nacionalista.

relacionada O PP recrimina a Lores que gaste 3.000 euros nunha cea e o alcalde táchao de "paletada"
relacionada ​Rafael Louzán pide a baixa temporal do PP

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress