Urxencias do CHUS urxe medios humanos e materiais pola súa "situación insostíbel"

Persoal do servizo de Urxencias do Complexo Hospitalario Universitario de Santiago (CHUS) demanda máis medios humanos e materiais para "emendar" a "situación insostíbel" que aseguran que viven no seu traballo.

A través dun comunicado subscrito por persoal de enfermería, técnicos auxiliares en coidados de enfermería e celadores, lamentaron que a xerencia do CHUS "ignorou" as peticións do persoal relativas a "escaseza de persoal e material" como "padiolas e cadeiras de rodas", entre outros, que consideran "imprescindible para a correcta asistencia aos usuarios", que, segundo subliñan, "son os principais prexudicados".

Respecto diso, lembran que o pasado 7 de febreiro foron recibidos pola xerente compostelá, Eloína Núñez, e a dirección de Enfermería, aos que expuxeron "as deficiencias de material tanto por carencia como por mal funcionamento tras 18 anos de uso" e "o déficit de persoal" para realizar o seu traballo "de maneira eficiente, segura e con calidade adecuada", subliñan.

Neste sentido, apuntan que nos servizos de urxencias "non se cumpren os cocientes persoal/paciente" nos hospitais galegos en xeral e aseguran que traballan "nunha contorna onde se incumpre a normativa laboral vixente en canto a seguridade laboral".

TENSIÓN E CARGA DE TRABALLO EXCESIVA

Tamén denuncian que están "sometidos a unha constante tensión laboral dada a excesiva carga de traballo e a imposibilidade de realizalo de maneira correcta e respectando a seguridade dos pacientes".

O persoal no seu comunicado sinala que "a única resposta" que se lles ofrece "é un cambio na organización dos circuítos avocado ao fracaso" xa que, concretan, "non vén acompañado do persoal necesario nin dos medios precisos".

"Consideramos nulo o resultado das nosas peticións, polo cal nos decidimos a facer pública nosa situación e a levar acabo as mobilizacións e actuacións que consideremos precisas en aras de defender os nosos dereitos laborais e os dereitos dos pacientes", subliñan.