​O presidente do Parlament reclámalle amparo a Estrasburgo para investir a Puigdemont

O presidente do Parlament, Roger Torrent, levará a defensa da investidura de Carles Puigdemont como presidente da Generalitat ao Tribunal Europeo de Dereitos Humanos de Estrasburgo a través dunha demanda que pedirá medidas cautelares.

A demanda de medidas cautelares "desborda as institucións do Estado e pon a decisión en mans dun órgano superior que podería tutelar os dereitos políticos de Puigdemont e garantir unha investidura efectiva".

Se a demanda fose estimada, resolveríase en 24 horas, aínda que, tal e como conta a información de Catalunyapress, a demanda non está presentada aínda e non hai unha data fixada para facelo.

ALEGACIÓNS AO TC

O Parlament pediulle este martes ao Tribunal Constitucional (TC) que desestime o recurso do Goberno que pide impugnar a resolución pola que Torrent propuxo a investidura de Puigdemont.

Catalunyapress explica na súa información que os letrados consideran que a impugnación que pide o Goberno central e as medidas cautelares do TC teñen un carácter "preventivo e puramente hipotético" que provocaría que fosen improcedentes, un argumento na liña do escrito remitido polo Consello de Estado, que considerou que non era o momento de presentar o recurso.

INVESTIDURA A DISTANCIA

A Mesa do Parlament non aborda na súa reunión deste martes a iniciativa de JxCat rexistrada o venres para modificar a Lei da Presidencia co obxectivo de poder investir a Puigdemont a distancia, e pediu que se tramitase polo procedemento de máxima urxencia e por lectura única.

Que non se inclúa a valoración da iniciativa para cambiar a Lei de Presidencia "permite a JxCat esclarecer que pide exactamente para non telo que tombar na Mesa por motivos formais", sinalan as mesmas fontes.