​Noriega reprocha que a dureza contra activistas non é "inocente"

O alcalde de Santiago, Martiño Noriega, expresou a súa "solidariedade" co activista do Carballiño Emilio Cao, que se enfronta a unha pena de máis de cinco anos de prisión por presuntamente agredir a un policía e causar desordes públicas no ano 2014 durante unha manifestación das 'Marchas da Dignidade' en Madrid.

Cuestionado sobre este asunto nunha comparecencia ante os medios este venres, o rexedor compostelán indicou que espera que "a vida" deste mozo --que cando sucederon os feitos tiña 17 anos-- "non quede truncada por unha esixencia de pena que é absolutamente inxustificada".

"É o exemplo do que vimos denunciando desde hai tempo, do que significa o recorte de dereitos fundamentais e liberdades. Está contextualizado nun momento histórico no que ante o malestar social houbo unha regresión nese espazo de dereitos e liberdades", argumentou Noriega.

Así, cre que se trata dun proceso "non inocente" que se leva a cabo "a través de ferramentas" como a Lei Mordaza ou "a interpretación" interesada do "marco legal" que deriva en "situacións que afectan a activistas sociais, artistas e músicos" que non se vivían "desde hai moitos anos".

FACENDA ATRASA PROXECTOS EDUSI

O Concello de Santiago xustificou os atrasos na posta en marcha dos proxectos financiados pola Estratexia de Desenvolvemento Urbano Sustentable e Integrado (Edusi) a "problemas" na validación das fichas económicas das actuacións, unha cuestión que lle corresponde ao Ministerio de Facenda.

Así as cousas, Martiño Noriega indicou que este problema lle afecta ao resto " de concellos" seleccionados para recibir fondos da Edusi e "non só a Santiago", á vez que mostrou a súa confianza en que a situación se vaia desbloqueando.

INTERMODAL

Pola súa banda, a conselleira de Infraestruturas, Ethel Vázquez, critica que o Concello de Santiago "está a ser bastante opaco" cos accesos á futura estación intermodal.

Tras o cruzamento de cartas e declaracións a finais de xaneiro entre Ethel Vázquez e o alcalde de Santiago, Martiño Noriega, a conselleira criticou de novo ao goberno local, mentres lembrou que a parte correspondente á Xunta do proxecto da intermodal de Santiago está en licitación, nun prazo para presentar propostas que acaba o 26 de febreiro.

"Gustaríanos que compartisen información real e oficial como estivemos a facer desde a Xunta de Galicia durante todos estes anos", queixouse a conselleira.