PAU Galicia: seguridade extrema para 13.000 aspirantes

Este martes comeza en Galicia a Proba de Acceso á Universidade (PAU) 2026 con 13.441 estudantes citados en 36 sedes repartidas por dez localidades das catro provincias, 495 matriculados máis que na edición anterior. Tres días de exames que marcarán o acceso aos graos universitarios do próximo curso. 

A Comisión Interuniversitaria de Galicia (CIUG), asinada polos delegados das tres universidades —Iván Area (UVigo), Víctor Arce (#USC) e Elisa Beceiro (UDC)—, publicou unha adenda ao protocolo oficial que amplía os poderes do profesorado vixiante. A partir de agora, os docentes das comisións delegadas poderán inspeccionar, en calquera momento durante os exames, lentes, calculadoras, bolígrafos ou outros elementos empregados polos alumnos cando así o consideren. Quen leve un dispositivo non autorizado será expulsado de inmediato.

A blindaxe tecnolóxica

Galicia leva máis dun lustro á vangarda neste terreo: só esta comunidade emprega detectores de frecuencia desde o ano 2019, co obxectivo de garantir a igualdade de oportunidades entre o alumnado. Este ano actualizáronse os propios dispositivos, que serven para detectar calquera tecnoloxía que implique transmisión de datos, o que tamén os fai eficaces contra o uso de intelixencia artificial. Galicia é unha das catro comunidades do Estado que persegue activamente o uso de IA nos exames, xunto con Murcia, Aragón e Cataluña. Os estudantes non se pronunciaron publicamente sobre estas medidas. 

A distribución xeográfica coloca á Coruña á fronte co 46,76% dos aspirantes, seguida de Vigo co 33,63%. Lugo e Ourense aglutinan o 10,14% e o 9,47% restantes. Por cidades, Vigo lidera con 3.026 alumnos, seguida da Coruña (2.855) e Santiago de Compostela (2.472). Para facilitar o acceso desde zonas rurais, habilitáronse tribunais en institutos de Viveiro, A Rúa e Cee.

Tres días obrigatorios

Unha particularidade deste ano —que xa se aplicou en 2025— é que todos os estudantes deberán acudir o tres días completos. O exame de Lingua Galega e Literatura desprazouse á mañá do xoves, eliminando a posibilidade de que parte do alumnado finalizase o mércores pola tarde, como ocorría en edicións anteriores cando ese terceiro día reservábase só para materias optativas.

A proba arrincará o martes 2 de xuño con Lingua Castelá e Literatura e pechará o xoves 4 con Lingua Galega e Literatura. A convocatoria extraordinaria está fixada para o 30 de xuño e os días 1 e 2 de xullo.