Edís composteláns expulsados do PSOE ven "escandaloso" que se resolva antes o seu expediente que o de Ábalos

As concelleiras de Santiago de Compostela expulsadas do PSOE Mercedes Rosón e Mila Castro consideraron que "sería escandaloso" que o seu expediente concluíse antes que outros que levan meses pendentes como os que afectan o alcalde do Carballiño, Francisco Fumega, ou ao exministro de Transportes, José Luís Ábalos.
 

Rosón e Castro pronunciáronse deste xeito ao ser preguntadas polas declaracións efectuadas polo secretario provincial do PSOE coruñés, Bernardo Fernández, nas que asegurou que a comisión de ética e garantías ten un prazo duns 15 días para analizar as alegacións dos catro edís composteláns expulsados para despois decidir si esta medida é definitiva.

"Si é certo que o obxectivo, como vimos denunciando desde hai semanas, é que nos manden para casa, pois posiblemente si entenderiamos que chegase esta semana, se non, non se entendería", sostivo Mila Castro.

Ademais, na rolda de prensa e interpeladas polas críticas das direccións do PSOE local, provincial e galego á carta asinada por centenares de cidadáns, entre eles o expresidente da Xunta, Emilio Pérez Touriño, en apoio a Mercedes Rosón, Mila Castro, Gonzalo Muíños e Marta Álvarez, as edís consideraron que a dirección ten "un serio problema" se non quere entender a mensaxe lanzada por estas persoas.
 

Deste xeito, tras mostrar o seu sincero agradecemento aos asinantes, dixeron que "reducir e devaluar" unha iniciativa cidadá como esta resulta "totalmente inexplicable" e terá consecuencias no presente e no futuro do PSOE tanto na provincia como na cidade.

Ademais, despois de que a dirección do partido dixese que só asinaban a carta "tres militantes", Mila Castro, que foi secretaria xeral do PSOE compostelán, lembrou que dos 300 militantes que ten o partido na cidade "uns 50" rubricaron a misiva.

Entre eles, figuran, ademais do propio expresidente Touriño, personalidades como o exalcalde de Santiago, Xosé Sánchez Bugallo; a exdiputada Noa Díaz; a que fóra secretaria de Organización do PSOE compostelán Carmen Fernández Morante; e outros socialistas como Fernando Blanco, Elena Borrás, Francisco Candela, Fransciso Garbayo, Begoña Rodríguez, entre outros.

Por último, preguntadas polas palabras nas que o actual secretario xeral do PSOE compostelán Aitor Bouza recoñeceu "erros" por ambas as partes, Mila Catro preguntou se eses erros son o esixir a acta das concelleiras, a decisión de "cesar ao persoal eventual" a pesar de que fai un gran labor ou "obrigar aos concelleiros do grupo a bloquear a ordenanza que completaba a regulación das vivendas de uso turístico".

"Nós imos ser expulsados, se o comité de ética non o remedia, por non asistir á convocatoria dunha reunión á que nós mesmos explicamos que non iamos asistir por considerar que era nula de pleno dereito", incidiu.

Por último, volveron a confirmar a súa intención de esgotar o mandato como concelleiras aínda que teñan que ir para o grupo de non adscritos --no que non contarían con asignación económica--, así como a súa vontade de defender os seus dereitos ante a xustiza se é necesario.