Manifestación o 29 de decembro en Monforte de Lemos para esixir a dimisión de Tomé

Monforte de Lemos (Lugo) acollerá o luns 29 de decembro unha manifestación de protesta contra o alcalde, José Tomé, que tras as acusacións de acoso sexual, mantén o seu cargo como rexedor da localidade, aínda que dimita da presidencia da Deputación e da dirección xeral do partido socialista provincial.
 

A concentración organízase coincidindo coa celebración do pleno municipal e está convocada ás 19.30 horas no Campo de San Antonio, media hora antes do inicio da sesión plenaria, prevista para as 20.00 horas.

A mobilización está organizada pola Marcha Mundial das Mulleres, colectivo que impulsou a convocatoria tras contactar con Laura Fajín, vinculada a distintos colectivos feministas da comarca. Baixo a lema 'Machistas fóra das institucións', as organizadoras reclaman a súa dimisión inmediata tamén como alcalde.
 

Desde a organización denuncian que, a pesar das denuncias abertas, o alcalde "non asumiu ningún tipo de responsabilidade política nin realizou un exercicio de autocrítica", unha circunstancia que, ao seu xuízo, contribúe á "impunidade deste tipo de comportamentos e deixa ás mulleres nunha situación de desprotección". Neste sentido, subliñan a necesidade de que as institucións públicas actúen con firmeza fronte a actitudes machistas.
 

As convocantes animan á cidadanía a participar tanto na manifestación como no pleno municipal, que é de carácter público, co obxectivo de visibilizar o rexeitamento social a esta situación e esixir a dimisión do edil. Consideran, ademais, que a permanencia de Tomé na corporación municipal "causa un grave dano á imaxe das mulleres en política e tamén ao do PSdeG", formación á que estivo vinculado, ao entender que non pode prevalecer, sinalan, "ningunha ansia de poder" por encima da responsabilidade política e ética.