O persoal civil de Defensa en Ferrol escala as súas protestas pola discriminación salarial

O persoal civil do Ministerio de Defensa en Ferrol intensifica as súas mobilizacións contra o que consideran unha grave inxustiza salarial. Tras meses de protestas internas, o colectivo convocou unha manifestación para o vindeiro xoves 13 de novembro co obxectivo de facer visibles as súas demandas nas rúas da cidade naval. Este persoal, composto por unhas 500 persoas —entre réxime laboral, funcionario ou estatutario—, realiza tarefas esenciais que abarcan desde o mantemento de instalacións e embarcacións militares até funcións administrativas, docentes nas Escolas de Especialidades, sanitarias e de enxeñaría.

A orixe do conflito reside nunha decisión ministerial que o colectivo cualifica de discriminatoria: o Ministerio de Defensa aplicou un aumento salarial á parte militar do seu cadro de persoal, excluíndo ao persoal civil. Esta situación agravouse recentemente ao producir unha nova discriminación interna, xa que o Ministerio aprobou unha mellora salarial só para o persoal laboral, deixando fóra da subida aos empregados de réxime funcionario e estatutario.

O APOIO DO SECTOR NAVAL

Como paso previo á manifestación, a Asemblea do Persoal Civil do Ministerio de Defensa en Ferrol organizou un acto público de apoio que se celebrará o xoves 6 de novembro ás 11:00 horas. O evento terá lugar na porta principal de Navantia (rúa Taxonera), onde se escenificará o respaldo dos Comités de empresa de Navantia Ferrol e de varios Comités de empresas da industria auxiliar que operan habitualmente na parte militar do estaleiro.

Esta iniciativa busca visibilizar a solidariedade entre traballadores dos ámbitos público e privado do sector naval de Ferrol que comparten espazo laboral. A Asemblea, que agrupa a diferentes sensibilidades sindicais, afirma que as decisións ministeriais, lonxe de achegar solucións, están a intensificar unha situación de clara discriminación.

A gran manifestación do día 13 sairá ás 11:00 horas desde a porta do Parque do Arsenal e finalizará o seu percorrido ante o edificio de Facenda en Esteiro. Con esta acción, o persoal civil busca presionar publicamente ao Ministerio para lograr unhas condicións salariais dignas e equitativas.