71 persoas morreron en Galicia esperando que lles recoñecesen o seu dereito á prestación por dependencia

En Galicia 71 persoas dependentes faleceron sen obter ningunha axuda, segundo un informe da Asociación de Directores e Xerentes en Servizos Sociais con datos o 1 de outubro. No entanto, trátase dunha das comunidades autónomas nas que se reduciron os tempos de tramitación (-37 días) e unha nas que máis aumentaron as persoas con dereito a prestación, un 14%.
 

O tempo medio rexistrado desde a solicitude até a resolución do expediente é de 349 días, coincidindo coa media española. En canto ás persoas pendentes de recibir prestación, a porcentaxe sitúase no dous por cento en Galicia, que figura entre as de menor investimento en dependencia.

Así se desprende do citado informe que indica que cada 15 minutos falece unha persoa dependente en lista de espera que, nos primeiros nove meses deste ano, creceu en 13.695 persoas.

Até o 1 de outubro, 284.020 persoas atopábanse á espera de valoración ou pendente de prestacións e servizos que teñen recoñecidos. A tenor destes datos, a asociación advertiu dun "cambio de tendencia" por primeira vez en dez anos ao pasar dun redución paulatina da lista de espera desde 2015 ao incremento rexistrado no de vai de ano.

A nivel estatal, en 2025 son 25.060 as persoas dependentes que faleceron sen obter ningunha axuda, dos que 13.713 esperaban ser valorados e 11.347 a recibir unha prestación á que tiñan dereito. "93 persoas ao día, unha cada 15 minutos", lembraron Directores e Xerentes. Segundo os seus datos, dous de cada tres faleceron en Cataluña (6.851), Andalucía (5.292), C. Valenciana (2.290) e Canarias (1.904).

Respecto ao tempo de demora, a Asociación de Directores e Xerentes nega que se produciu unha redución senón un incremento duns 15 días de media até alcanzar os 349 días e reprochou ao Ministerio de Dereitos Sociais que tente "rebaixar a cifra de desatención" ao contabilizar "só" a aquelas persoas "coas que a Administración non está a cumprir a lei que establece en 180 días o prazo máximo para recibir a prestación ou servizo que teñan recoñecido".

ANÁLISE POR AUTONOMIAS

Por comunidades autónomas, as que teñen maior limbo da dependencia -- persoas pendentes de recibir a prestación -- son Canarias (31,3%), País Vasco (15,7%), Murcia (13,8%), e Cataluña (13,6%); e as que menos Aragón (1,5%), Cantabria (1,5%), Galicia (2%) e Navarra (2,1%).

Oito comunidades aumentaron, ademais, o número de solicitantes o limbo da dependencia en 2025: Castela A Mancha (+58%), Cantabria (+29,9%), e Madrid (+29,6%) lideran este aumento. Máis da metade (53%) das persoas que se atopan no "limbo da dependencia" residen en tres Comunidades: Cataluña (38.002), Andalucía (21.785) e Canarias (20.127).

Así mesmo, as comunidades que máis aumentaron as persoas beneficiarias con prestación este ano foron Canarias (+18,5%) e Galicia (+15,7%). Pola contra, hai unha Comunidade que diminuíu o número de persoas atendidas: A Rioxa (-0,1%).
 

Por normativa, o prazo máximo para resolver un expediente sitúase en seis meses (180 días), pero só hai catro comunidades e Ceuta e Melilla (155) por baixo a esa marxe nas súas medias: Castela e León (113), País Vasco (130), Aragón (152) e Castela A Mancha (169). Navarra (200) e Cantabria (211) atópanse cerca do prazo máximo. No outro extremo estarían Andalucía (559 días), Murcia (563 días) e Canarias (478 días).

Respecto do investimento en dependencia, as comunidades que máis invisten son País Vasco (2.835 euros por persoa dependente) e Estremadura (2.779 euros), e as que menos Galicia (1.317 euros) e Canarias (1.339 euros).