A extinción do vertedoiro da Rúa é un tema "de xestión municipal", recalca a Deputación, que asumiu o labor

O presidente da Deputación de Ourense, Luís Menor, recalcou este luns en rolda de prensa que a administración provincial asumiu a extinción do incendio no vertedoiro da Rúa, a pesar de que "é de xestión municipal".
 

Consultado polos medios acerca deste asunto, Menor destacou que "como Deputación" non existe "a obrigación" de facerse cargo de "resolver o problema". Así, reiterou que o Concello non pode "botar a culpa aos demais" dunha cuestión que "debe resolver" a administración local.

"Se eu son alcalde e teño ese problema, primeiro tento resolvelo; e si non teño a capacidade, entón acudo a estas institucións. Pero non podo dicir que a culpa a teñen os demais", sinalou.

Neste contexto, insistiu en que "unha cousa é cooperar" e outra "asumir a totalidade das responsabilidades", tras o que lembrou que "desde o primeiro minuto" a Deputación "xa se puxo a disposición" do Concello para "facelo con medios propios".

"MOMENTO DELICADO" 

Ademais, Menor insistiu en que a provincia "continúa nun momento delicado" tras a vaga de incendios e sinalou que agora comeza a "segunda parte" coa "reparación dos danos causados".
 

Lembrou que, desde este sábado, os damnificados polos lumes "poden acceder e solicitar" nun "prazo curto" ás axudas aprobadas no Consello da Xunta o pasado venres: "É un compromiso da Xunta, neste caso, dar esa resposta inmediata para quen perdeu a súa vivenda, un negocio ou a súa colleita".