Falece Luís Ferreiro Loredo, fillo do poeta Celso Emilio Ferreiro

Luís Ferreiro Loredo, fillo do poeta Celso Emilio Ferreiro, faleceu este mércores, 24 de decembro, aos 80 anos de idade.

Nun comunicado, o alcalde de Celanova e presidente da Fundación Curros Enríquez, Antonio Puga, trasladou o seu profundo pesar pola morte de Ferreiro Loredo, "celanovés de corazón", aínda que debido á actividade profesional do seu pai non naceu na localidade ourensá.

Promotor, xunto cos seus irmáns e a súa nai, da Fundación Celso Emilio Ferreiro na que centrou unha boa parte da súa vida a promover e divulgar tanto a obra publicada como aqueloutra inédita do autor de 'Onde ou mundo se chama Celanova', nos últimos anos tivo un interese especial en incrementar a presenza da memoria do poeta no seu municipio natal.

Alí levou a cabo diversas iniciativas editoriais que axudaron a configurar publicamente o seu perfil poético, social e político fundamentalmente da posguerra.

Así mesmo, Luís Ferreiro representou á familia do poeta durante anos na Fundación Curros Enríquez e a súa foi a voz autorizada, tamén en representación da familia, para todo o que tiña que ver co traballo de difusión da obra literaria e do pensamento do seu pai en toda Galicia.