Onda de violencia na sanidade galega: nova agresión na PAC de Boiro

Un individuo chegou ao centro sanitario alegando un malestar físico e, tras a chegada da súa esposa e a súa sogra, a situación tornouse aínda máis tensa. Tras unha acalorada discusión, o home tentou forzar a entrada á PAC e, ao ser bloqueado polo peche de portas, arremeteu cunha cadeira contra os cristais do centro, o que obrigou ao persoal a solicitar a presenza da Policía. Finalmente, o agresor foi detido tras unha breve persecución.

Desde a Central Sindical Independente e de Funcionarios critícase a “pasividade” da xerencia, que unicamente reforzou o servizo cun celador adicional e trasladou palabras de ánimo ao persoal, unha reacción que o sindicato considera claramente insuficiente.

Alerta sindical polo repunte de agresións

#CSIF advirte dun “alarmante incremento” de episodios violentos contra sanitarios en Galicia nos últimos meses, nun contexto nacional onde o ano 2024 pechou con 16.558 agresións a profesionais da saúde, a cifra máis alta desde que existen rexistros oficiais. O sindicato recalca que este tipo de sucesos non son feitos illados e reclama á Consellería de Sanidade a posta en marcha de medidas urxentes e tanxibles para garantir a integridade física e emocional do persoal sanitario.

Entre as demandas de CSIF atópanse o reforzo estable de vixiantes de seguridade en centros de saúde e PAC, a revisión inmediata dos protocolos de actuación fronte á violencia, a implantación de programas formativos en técnicas de desescalada e campañas de sensibilización para a cidadanía.

A resposta da Xunta: endurecemento legal e novas medidas

Ante o incremento de agresións, a Xunta de Galicia iniciou unha reforma da Lei de Saúde para blindar por lei a protección dos sanitarios fronte á violencia física e verbal. Entre as principais novidades, o Goberno galego poderá sancionar administrativamente aos agresores, mesmo se os feitos non constitúen delito, con multas que oscilan entre os 300 e os 15.000 euros. Ademais, as xerencias sanitarias comunicarán de oficio á Fiscalía calquera agresión, aínda que a vítima non presente denuncia, e a Xunta ofrecerá asistencia xurídica e psicolóxica automática aos profesionais afectados.

A nova normativa contempla tamén a creación dun rexistro único de actos violentos no ámbito sanitario, a ampliación dos botóns de alerta nos centros e a posta en marcha dun plan autonómico de prevención que avalíe os riscos en cada centro de saúde. Estas medidas buscan frear unha tendencia preocupante e garantir unha contorna segura para quen coidan da saúde da poboación galega