Case mil profesionais de xestión empezan no Sergas
O Servizo Galego de Saúde (#Sergas) incorporará no próximo mes un total de 908 profesionais que obtiveron praza en procesos selectivos para o ingreso en 36 categorías de persoal de xestión e servizos, coñecidos comunmente como PSX.
En concreto, o Diario Oficial de Galicia (#DOG) publica este luns senllas resolucións da Dirección Xeral de Recursos Humanos do Sergas, unha dun concurso de méritos e outra dun concurso-oposición, coa adxudicación definitiva de destinos para estas 908 persoas.
Así, este martes abrirase o prazo dun mes, até o 9 de xullo, para que os aspirantes que obtiveron praza poidan tomar posesión no seu novo posto. Incorporaranse profesionais de distintas categorías, entre elas celadores, administrativos, auxiliares administrativos, limpadores, mecánicos, piques de cociña e traballadores sociais.
A falta de incorporación no prazo referido, cando sexa imputable á persoa interesada e non responda a causas xustificadas, implicará que perderá o seu dereito a obter a condición de persoal estatutario fixo.
En casos de forza maior, e por instancia da persoa interesada, a Dirección Xeral de Recursos Humanos poderá prorrogar o prazo de toma de posesión.
A adxudicación publicada este luns inclúe 15 persoas que entran na categoría de celador pola quenda de discapacidade intelectual.
Con todo, quedan pendentes de adxudicar, nunha segunda volta do proceso de concurso-oposición, 14 vacantes de celador e 17 de auxiliares da función administrativa. Así mesmo, por só concurso de méritos, están por adxudicar 32 e 10 prazas das mesmas categorías, respectivamente, que se resolverán nos próximos meses.
Escribe o teu comentario