Quinto centenario da segunda circunnavegación ao mundo que partiu da Coruña en 1525

A segunda circunnavegación á Terra, que partiu da Coruña en 1525 capitaneada por García Jofre de Loaísa, cumpre 500 anos neste 2025, despois da levada a cabo previamente pola expedición Magallanes-Elcano (1519-1522).

A Coruña acollerá este xoves, 8 de maio, o que será o primeiro acto de conmemoración do V centenario desta expedición ás Molucas, en concreto, coa presentación do libro 'Galicia e a segunda circunnavegación á terra. Século XVI' (Edicións Cartamar), do autor Santiago Juega Puig. A cita terá lugar ás 19,00 horas no salón de actos da Autoridade Portuaria.

"O 24 de xullo de 1525 partiu da Coruña a expedición de Loaísa, formada por 450 homes e 7 naves. Iba de segundo de a bordo e piloto maior Juan Sebastián Elcano. A misión era chegar ás illas Molucas para comezar o comercio das especias. As dificultades da navegación provocaron o afundimento dunha das naves e a deserción doutras dúas. Os restos da armada dispersáronse nun terrible temporal e nunca se reencontraron. Só a nave capitá chegou ao seu destino, onde xa estaban establecidos os portugueses, cos que tiveron unha relación guerreira extremadamente heroica sen máis apoio durante moitos anos que a chegada dunha nave desde México".

Así resume a xesta a obra de Juega Puig, que engade: "No V Centenario da circunnavegación da expedición de Loaísa, é indispensable realizar esta homenaxe aos homes que levaron a cabo tal fazaña, así como aos que lle precederon e os que continuaron achegando unhas terras antes inalcanzables".

Este libro é un resumo da súa historia, "un recordo do que intrépidos navegantes puideron conseguir cando non existían rutas e todo era descoñecido, sen importarlles os perigos aos que tiveron que enfrontar". "É un agradecemento á súa tenacidade e a súa contribución a facer España máis grande", afirma o autor.

Santiago Juega Puig é licenciado pola Universidade de Santiago de Compostela, profesor e escritor. É autor de libros como 'O porto da Coruña. Evolución económica 1962-1985', publicado pola Deputación da Coruña en 1991, e 'Periplo ao Maluco. A Casa de Contratación de Especiería da Coruña 1522- 1529' (Edicións Boreal, 2022).