Colexio de Xornalistas e Xunta elaboran unha guía de boas prácticas para o tratamento informativo da conduta suicida

A Consellería de Sanidade acolleu a segunda reunión do grupo de traballo 'Saúde mental e comunicación' que puxeron en marcha a Xunta e o Colexio de Xornalistas co obxectivo de elaborar unha guía de boas prácticas sobre o tratamento informativo da conduta suicida.

Este grupo, detallou a Xunta nun comunicado, está formado por psicólogas da subdirección xeral, profesionais da psicoloxía clínica, psquiatría, divulgación científica e xornalismo.

Este proxecto forma parte do obxectivo da Consellería de Sanidade de contribuír á sensibilización e desetigmatización social das enfermidades de tipo mental.

O primeiro tema que tratarán é a conduta suicida por ser unha das principais causas de morte non natural e un problema de enorme complexidade que require dun enfoque multidisciplinar e da implicación do conxunto de axentes sociais.

Por iso, elaboran este documento co obxectivo de achegar ás redaccións dos medios de comunicación recomendacións destinadas á elaboración de informacións relacionadas coa conduta suicida.