(VÍDEO) Cazadores enfróntanse con veciños de Grixalba, en Sobrado, durante batidas do raposo

Estes días de inverno, en zonas rurais, moitos veciños espértanse co son dos escopetazos. As batidas de cazadores en busca de raposos ou xabarís alteran a vida dos residentes que sofren tamén os ruídos produto dos ladridos dos cans rastreadores ou do tráfico de todoterreos e remolques. Con todo, a presenza dos cazadores en ocasións non se limita só aos montes, xa que a dispersión xeográfica que impera en Galicia fai que moitas veces as actividades cinexéticas choquen de maneira frontal cos quefaceres cotiáns, enfrontando a cazadores e veciños como ocorreu na parroquia de San Xiao de Grixalba, en Sobrado. 

TENSIÓN E ROZAMENTOS

Neste municipio coruñés viviuse unha desagradable escena que relatan desde o Partido Animalista PACMA, que denuncian a "agresión sufrida por unha veciña a mans de varios cazadores". Na mesma nota, e sempre segundo o testemuño da denunciante, a muller de 56 anos asegura que o pasado mes de novembro uns cazadores irromperon na súa propiedade "para perseguir e abater a dous raposos usando cans de caza". 

A continuación, explica que os cazadores "acurralaron aos animais no seu terreo e disparáronlles até en cinco ocasións". A gravación ten lugar cos animais xa abatidos e os cans nas gaiolas do remolque. Cos animais sobre o remolque, a muller enfróntase cos cazadores, advertindo que chamou á Garda Civil, momento no que escala a tensión entre ambos con reproches, zarandeando a cámara e increpando á muller, que con todo confróntaos: "Non me toques! Esta é a miña casa!". 

Desde PACMA sinalan que os cazadores actúan "mesmo fóra de tempada, o que pon en risco tanto aos animais como aos propios veciños". "Este tipo de incidentes non son casos illados. A caza non só é unha ameaza para a fauna silvestre, senón tamén para a seguridade dos cidadáns", critica a formación política, que puntualiza a "brutalidade da caza" co uso de cans para acurralar aos raposos que "son perseguidos até a extenuación para daquela ser abatidos sen finalidade algunha máis que o lecer de quen practican a actividade".