Por que o grao de Traballo Social ten que ser privado (da Igrexa) nunha universidade pública (#USC)?

A protesta marchará este mércores ao mediodía entre o Colexio Oficial de Traballo Social e acabará na  Praza do Obradoiro. Convócaa a colectivo “Matrícula 0” da Asemblea Estudantil da Escola Universitaria de Traballo Social. 

Hai dous sindicatos de estudantes que apoian a protesta: o recentemente constituído Fervenza, e Erguer. O  Colexio Oficial de Traballo Social de Galicia tamén mostrou o seu respaldo.

A Escola Universitaria de Traballo Social é un centro adscrito á Universidade de Santiago de Compostela (Escola Universitaria de Traballo Social | Universidade de Santiago de Compostela), o que significa que forma parte da universidade e ofrece o título de Grao en Traballo Social. Ofrece 80 prazas por curso e hai máis de 300 matriculados.
 

A manifestación chega nun momento onde moitas miradas están postas sobre a educación superior privada. O Goberno de España promove unha nova regulación para pór coto a supostos ‘chiringuitos’, tras a proliferación de centros universitarios privados nos últimos anos.

A EUTS de Santiago non é de recente creación. Está xestionada pola Fundación Santiago Apóstol de Ciencias Sociais, creada en 1999 e declarada de interese galego e docente. A fundación ten unha conexión coa Igrexa católica xa que o arcebispo de Santiago Francisco José Prieto asumiu o cargo en xuño de 2023. A facultade está, ademais, nun recinto privado, o Mosteiro de San Martín Pinario.

A escola está adscrita á Universidade de Santiago de Compostela desde 1983, o que significa que os estudantes son, para todos os efectos, alumnos da universidade, e o título é expedido polo centro público. 

A calidade da educación non foi cuestionada nas enquisas realizadas pola USC. Non suspende en ningún baremo. O último dato de “Satisfacción xeral de graduados co grao”, é de 3,5 sobre 5.  A satisfacción co ensino recibido oscila entre 4.04 e 4.27 sobre 5, e coas prácticas externas entre 4.16 e 4.79.