Traballadoras de residencias privadas protestan contra malas condicións e baixos salarios
Este venres, 14 de febreiro, as rúas da Coruña e Lugo serán testemuña das primeiras mobilizacións das traballadoras de residencias privadas na súa loita por un convenio colectivo xusto e salarios dignos. As protestas, convocadas pola CIG, buscan tamén un modelo de coidados que priorice ás persoas sobre o beneficio empresarial.
A negociación do convenio colectivo atópase estancada desde outubro, tras unha proposta patronal considerada insuficiente pola representación sindical. Segundo denuncian, a oferta mantén ás traballadoras co salario mínimo interprofesional, sen avances na redución de xornada nin melloras nas coberturas de incapacidades temporais ou de carácter social.
Na Coruña, a manifestación partirá ás 11:00 horas desde a residencia DomusVi da Cidade Vella até as oficinas da Fundación Amancio Ortega no Obelisco. En Lugo, realizarase unha concentración ás 12:00 horas fronte á residencia Serge de Láncara.
As representantes do sector en Ferrol e A Coruña, Beatriz Fernández e Ana Domato, alertan sobre a precarización laboral desde o último convenio (2020-2023), con salarios por baixo do IPC e a antigüidade sen impacto salarial. Tamén denuncian a sobrecarga de traballo por cocientes insuficientes, sinalando que non se valora a experiencia laboral.
Adolfo Naya, secretario de Negociación Colectiva de CIG-Servizos, critica que Política Social presume de construír novas residencias, cando son doazóns da Fundación Amancio Ortega que despois a Xunta entrega á xestión privada.
As mobilizacións continuarán o 28 de febreiro en Pontevedra. O persoal de residencias de maiores privadas estivo realizando protestas pola falta de avances na negociación para renovar o convenio colectivo.
Escribe o teu comentario