Debate pola falta de pediatra en Brión enfronta ao BNG e ao SERGAS

O #BNG de Brión denunciou a ausencia de pediatra no centro de saúde do municipio, que atende a unha poboación de máis de 8.000 habitantes. Segundo sinalan, desde o pasado 20 de decembro numerosas familias víronse afectadas pola cancelación ou o adiamento de citas médicas para os seus fillos. Aínda que as consultas estaban previstas para renovar o pasado 8 de xaneiro, a falta deste profesional continuará polo menos até o 15 de xaneiro, segundo reflíctese na aplicación #Sergas Móbil.

A formación política subliña que a situación obriga ás familias a desprazar a centros próximos como o de Negreira (a 10 quilómetros de distancia), o que supón unha dificultade engadida, especialmente tras un mes no que Negreira, Brión e Bertamiráns careceron simultaneamente do servizo pediátrico.

O BNG considera que esta problemática é resultado dunha xestión insuficiente por parte da Xunta, á que acusan de non cubrir as baixas nin as vacacións do persoal sanitario. Ademais, instan ao Concello de Brión a realizar as xestións necesarias para que o servizo sexa restablecido canto antes.

A versión do SERGAS: atención garantida

En resposta ás críticas, o #SERGAS asegura que os menores de Brión contan cunha atención sanitaria de calidade, mesmo en ausencia temporal do pediatra asignado ao centro de saúde local. Segundo explican, os profesionais administrativos do centro están a traballar para ofrecer solucións adaptadas a cada caso.

A Xunta sinala que os nenos e nenas que necesiten atención pediátrica poden ser derivados ao seu pediatra habitual en próximas datas, ser atendidos por un médico de familia no propio centro de saúde de Brión, ou ser atendidos nos centros de Negreira ou Bertamiráns, situados a 14 e 6 minutos respectivamente.

Desde o SERGAS tamén destacan que non recibiron ningunha queixa formal relacionada con esta situación temporal, e recalcan que a atención está garantida a través das alternativas propostas.