Bombeiros Comarcais de Galicia insta ao Concello de Vigo a dotar servizo de medios e persoal axeitados

A representación do Colectivo de Bombeiros Comarcais de Galicia enviou unha mensaxe de apoio e respecto aos traballadores do Servizo de Prevención e Extinción de Incendios e Salvamento do Concello de Vigo, especialmente, indican, a aqueles que tiveron que atender a intervención do pasado mércores na rúa Alfonso X ou Sabio, en Vigo.

Aseguran que "calquera intervención con vítimas mortais deixa unha ferida que se engade silenciosamente á experiencia persoal de calquera bombeiro, especialmente cando entre esas vítimas atopamos menores".

Reivindicaron ademais que as particularidades do traballo de bombeiro requiren "máis atencións, medios e persoal, conforme os sinistros crecen no seu perigo". Fixo referencia ás particularidades de zonas como Vigo, que atenden a unha ampla densidade de poboación.

Así, mostraron a súa solidariedade "cos profesionais do SPEIS de Vigo, un corpo que leva mostrando o seu compromiso coa veciñanza ao que se debe desde fai máis dun século".

"Consentir que o Servizo de Extinción de Incendios estea a prestarse en condicións inferiores ás establecidas implica que os responsables da prestación deste servizo sexan cómplices de calquera desgraza que cunha dotación de persoal axeitada póidase evitar", lamentaron desde o Colectivo.

Finalizaron o seu escrito instando as autoridades do Concello de Vigo a que na maior brevidade posible "doten de persoal e medios suficientes ao SPEIS de Vigo"