Os eucaliptos galegos "bébennos" 11 mil millóns de litros de auga diarios, unhas 2.750 piscinas olímpicas, calculan ecoloxistas

En Galicia hai unhas 550.000 hectáreas de eucalipto, segundo as estimacións da 'Asociación Ecoloxista Arco Iris', que considera que as plantacións se dispararon este ano pese ao veto. 

Así, e nun escenario como o actual de seca, o consumo de auga desta especie invasora representa encher ao longo do ano 165 veces o encoro de Cecebre. 

Galicia vive unha situación sen precedentes. A pesar das copiosas choivas dos últimos días, as estimacións dos expertos seguen sen ser positivas. Farían falta aínda varias semanas con choivas igual de intensas e continuadas para deixar atrás a seca na comunidade. As consecuencias do cambio climático fixéronse notar de forma severa nunha comunidade que nunca pensou vivir unha situación así. Á seca hai que engadir os devastadores incendios do pasado verán. Neste escenario de climas extremos e temperaturas cada vez máis cálidas dáse o caldo de cultivo para que arraigue, aínda máis profundo, un problema que acosa aos nosos montes: o eucalipto.

Esta especie invasora, ademais de ter unha influencia directa sobre os incendios, seca os mananciais e arroios da comunidade. Non son poucos os lugares de Galicia nos que, tras a chegada desta especie a algunhas localidades, percibiron como algúns regachos perdían #caudal progresivamente até #secar. "A auga lambena toda", sinalan os máis maiores do lugar, aqueles que lembran como a auga chegaba até os lavadoiros e fontes antes de que proliferasen as plantacións que substituíron a piñeiros ou carballos. 

BEBEN 2.750 PISCINAS

A 'Asociación Ecoloxista Arco Iris' pon o acento xusto nesta circunstancia, considerando que a extensión dos eucaliptos na comunidade rolda as 550.000 hectáreas de terreo, aínda que algunhas estimacións sitúan a cifra ao redor das 600.000. "O Plan Forestal de 1992 prevía que para 2030 habería en Galicia 245.000 has. de eucaliptos", lembran, unha cifra "moi excedida na actualidade". 

"Desde ese ano e até hoxe, as novas plantacións de eucalipto disparáronse ante a previsión da moratoria xa aprobada por Medio Rural, polo que estariamos a falar dunha cifra próxima ás 550.000 has", razoan. 

Neste sentido, o consumo de auga que fan os eucaliptos a diario é de 11 mil millóns de litros. As contas dos ecoloxistas son as seguintes: se  consideramos que cada eucalipto consome a diario uns 20 litros, por cada hectárea podemos calcular un milleiro de árbores -o que supón un consumo duns 20.000 litros diario- , e hai unhas 550.000 hectáreas de eucalipto na comunidade, o resultado dános esa cifra astronómica. É o equivalente a encher 2.750 piscinas olímpicas coas súas preto de 4 millóns de litros cada unha.

Son en todo caso cifras estimadas e que varían, xa que non é o mesmo o consumo de auga que pode facer un eucalipto de tres anos que un de 20, pero tomando como referencias o de tres anos xa nos dá unha cifra desorbitada. No entanto, os seus cálculos levan aos ecoloxistas á conclusión de que o consumo de auga anual dos eucaliptos galegos supón encher 165 veces o encoro de Cecebre, respondendo sempre a "datos extremadamente conservadores". Un encoro ao que, por certo, a seca empuxou a enconctrarse por baixo do 40% da súa capacidade. 

UN ESTUDO OFICIAL

"Esa é a contribución desta especie exótica á galopante seca que sofren cada ano en maior medida amplas zonas de Galicia. Esta especie pode desenvolver aos 10 anos unha raíz pivotante de máis de catro metros que busca auga e non para até absorber os recursos dispoñibles", advirten os ecoloxistas.

"Non é de estrañar que comarcas como Cangas-Moaña teñan que decretar cortes de auga este verán, tendo en conta a enorme masa de eucaliptos que rodea a autovía do Morrazo", critican, á vez que reclaman ás administracións públicas un estudo detallado do impacto real da especie "nas concas fluviais" para que Medio Rural poida "minimizar ou eliminar estes impactos ambientais".