O medo ás "picadas" chega ás festas galegas: así hai que actuar ante intentos de submisión química

Nos últimos días multiplicáronse na comunidade os casos de mozos que din ser vítimas de intentos de submisión química en discotecas ou eventos multitudinarios, como concertos ou festas patronais.

As autoridades alertan que, na maior parte dos casos, as análises non conclúen eses intentos de submisión química, pero a alarma social existe, está estendida e é máis que evidente.

Doutra banda, existen outros riscos máis aló do intento de narcotizar a alguén, xa que os instrumentos utilizados poden transimitir enfermidades como o VIH. Hai tamén unha serie de recomendacións ou pautas que seguir se presenciamos ou sufrimos unha "picada".

Esta semana aumentou o nivel de alerta en Galicia despois de varios casos de “picadas” na comunidade. En Nigrán e A Coruña reportáronse diversos casos que acabaron en denuncia por intentos de submisión química, mentres que en Cambados as redes sociais ruxiron porque, presuntamente, varias mozas foran picadas durante un concerto, feitos polo que rapidamente saíu o Concello de Cambados a desmentir, reducíndoo todo a un “bulo” de Twitter e Instagram. Días antes, durante as Festas do Apóstolo, en Santiago de Compostela, tamén se reportaron diversos casos parecidos. Pero este é un problema que vén de lonxe: en Ourense, o pasado outono, xa se rexistraron casos. 

Bulos ou non, o certo é que existe unha certa histeria colectiva condicionada por unha serie de noticias que nos últimos tempos axudaron a intensificar o temor de moitas novas, que ademais, no caso dalgunhas afectadas, presentan marchas compatibles coas temidas picadas. Desde o aumento no número de denuncias de vítimas de violacións grupais ata sentenzas tan polémicas como a dos dous policías de Estepona condenados por violar a unha nova. 

Pola outra banda, diversas fontes consideran que estas picadas poden estarse dando en discotecas ou concertos, pero non coa intención de someter químicamente ás súas vítimas, senón coa de asustar. 

Así, calquera cun mero instrumento punzante, pode provocar que se active unha alarma social co único fin de provocar o caos e augarlle a festa aos demais. Estas actitudes son as que traen de cabeza ás autoridades, xa que xeran nerviosismo na poboación sen que en ningún momento existise un risco real.

UNHA “BROMA” PERIGOSA

De igual maneira, estas picadas, aínda que non conteñan droga -moitos das análises realizadas ás presuntas vítimas non lanzaron resultados positivos en substancias narcóticas, aínda que isto non quere dicir necesariamente que non se aplicaron-, si poden supoñer un grave prexuízo para as vítimas, xa que as xiringas poden transmitir enfermidades como a Hepatite B, tétanos ou mesmo o VIH. 

En calquera caso, o aumento deste tipo de violencias puxo en garda tanto ás autoridades sanitarias como aos mozos e mozas, que por temor a este tipo de episodios pénsanllo dúas veces antes de participar en eventos multitudinarios ou, directamente, optan por non saír de festa.

QUE FACER

Neste escenario, moitos se preguntan que facer se, chegado o caso, producísese un suposto abuso destas características nun evento. Moitos artistas reaccionaron nas súas contas advertindo que, se se dese nun dos seus concertos ou espectáculos, os afectados puxésense inmediatamente en contacto con eles para parar o show e tratar de esclarecer o ocorrido. 

Segundo reportar algunhas afectadas, tras sufrir a picada sentíronse indispostas, mareadas ou somnolientas pasados uns minutos, chegando a perder a consciencia. Existen substancias capaces de provocar estes síntomas e que, ademais, poden provocar amnesia. 

Os expertos consideran que, para que se desen casos de submisión química, tería que inocularse o composto durante varios segundos, xa que non basta cunha leve picada. Así, suxiren que o risco neses casos, xa que unha persoa podería darse conta de que lle están inxectando algo se a picada é prolongado, é a posibilidade de que a agulla ou o instrumento non se atope debidamente desinfectado. 

PASOS A SEGUIR

De calquera xeito, en caso de sentir unha picada, as autoridades recomendan avisar na maior brevidade posible a xente de confianza da nosa situación para que, se comezamos a sentirnos indispostos, podamos ser atendidos e atopémonos acompañados en todo momento. Non é recomendable que, en caso de sentir unha picada, abandonemos o lugar sen comunicarllo a ninguén e tratemos de marcharnos ao noso domicilio, xa que, no caso de que aparezan síntomas, a situación podería ser aínda máis complicada. 

Unha vez comunicado o noso estado, acudir canto antes a Urxencias ou pedir auxilio a Emerxencias, á vez que estamos atentos aos posibles síntomas que poidan ir aparecendo e revisar a zona na que se notou a picada para comprobar se existen marcas. Os acompañantes poden alertar aos responsables do local ou do evento no que nos atopemos para advertir do ocorrido e que se tomen as medidas pertinentes. 

Outro elemento crave é denunciar os feitos ante as Policía ou Garda Civil, xa que é a única forma de que quede rexistro do ocorrido máis aló de que poidan facerse eco as redes sociais. 

Existen, doutra banda, outros riscos máis “clásicos”, se é que se pode utilizar ese termo, para a submisión química. O Ministerio de Xustiza estima que en torno ao 33% das agresións sexuais denunciadas no últimos cinco anos poderían producirse coa vítima baixo estado de submisión química. Substancias nas bebidas, como éxtase líquida ou burundanga, eran ata a data os métodos máis habituais para tratar de dobregar a vontade das vítimas. Tamén poden darse abusos sobre persoas que inxeriron drogas de forma voluntaria, xa que o agresor pode aproveitar o seu estado de vulnerabilidade para cometer o abuso. 

Esta semana hai unha gran variedade de eventos en Galicia: o festival Sorrías Baixas en Bueu, o 'Desembarco Viquingo' en Catoira, a Festa do Albariño en Cambados, o festival de Pardiñas en Guitiriz...citas nas que poderían darse episodios desagradables como os relatados, pero sobre os que hai que actuar con firmeza e responsabilidade para poder gozar do verán espazos seguros para todos e todas.