Detido un cidadán portugués en Pontevedra por presunto homicidio no seu país

A Garda Civil, a través do Equipo de Homicidios da Unidade Orgánica de Policía Xudicial da Comandancia de Pontevedra, detivo na localidade pontevedresa de Salcedo a un cidadán portugués, de 40 anos, sobre o que pesaba unha Orde Europea de Detención e Entrega emitida polas autoridades xudiciais portuguesas pola súa suposta implicación nun homicidio ocorrido en Setúbal (Portugal) o pasado ano.

Segundo recóllese no comunicado, os feitos remóntanse ao 16 de xuño de 2024, cando o agora detido efectuou, supostamente, varios disparos contra un vehículo ocupado por dúas persoas, provocando a morte dunha delas e causando feridas de gravidade á outra.

Tras o crime, o individuo fuxiu do país con documentación de identidade falsa para evitar ser localizado.

Grazas á colaboración entre a Garda Civil de Pontevedra e os Corpos Policiais Portugueses, púxose en marcha a operación conxunta Macanuda25, cos mecanismos de cooperación xudicial e policial existentes na Unión Europea.

Froito das investigacións levadas a cabo polo Equipo de homicidios, localizouse ao sospeitoso nun hostal da localidade de Salcedo, onde se atopaba aloxado baixo unha identidade falsa.

Tras unha serie de vixilancias e comprobacións de identidade, os axentes procederon á súa detención cando o individuo se dispuña a abandonar o establecemento.

O detido será posto a disposición do Xulgado Central de Instrución núm. 2 da Audiencia Nacional o vindeiro venres 18 de abril, que resolverá sobre a súa entrega ás autoridades portuguesas.