Adxudicada a redacción de proxectos para novas vivendas de promoción pública en Navia e Valdecorvos
O prazo para a presentación do proxecto é de dous meses desde a firma do contrato e para o de execución o prazo serán tres meses máis
A Xunta de Galicia adxudicou a redacción dos proxectos de 68 novas vivendas de promoción pública en San Paio de Navia, en Vigo, e en Valdecorvos, Pontevedra.
No caso de Navia, para a construción de 68 vivendas de promoción pública nas parcelas M-IIIB-7 e M-IIIB-8.
Segundo recollen nun comunicado, o consello de administración da Sociedade de Vivenda Pública de Galicia (Vipugal) adxudicou o contrato a Díaz e Díaz Arquitectos SLP, por importe de 199.730 euros.
O prazo para a presentación do proxecto é de dous meses desde a firma do contrato e para o de execución o prazo serán tres meses máis.
Actualmente, a Xunta de Galicia ten un total de 910 vivendas de promoción pública en execución en San Paio de Navia. Deste total, 316 vivendas teñen xa adxudicado o contrato de obra e 594 teñen licitados ou en redacción os correspondentes proxectos de construción.
A redacción dos proxectos das 101 restantes, que foron autorizadas recentemente polo Consello da Xunta, licitarase proximamente.
VIVENDAS EN VALDECORVOS
No caso de Valdecorvos, adxudicouse o contrato para a redacción do proxecto e dirección de obra para a construción de catro vivendas de promoción pública nos bloques 1 e 3 da parcela 13 de Valdecorvos.
O consello de administración de Vipugal adxudicou o contrato a Germán Gómez Espejo, por importe de 41.745 euros. O prazo para a presentación do proxecto básico é de dous meses desde a firma do contrato e para o de execución o prazo serán tres meses máis.
As vivendas serán resultado da transformación dos baixos existentes nos bloques 1 e 3 da parcela 13 de Valdecorvos.
182 VIVENDAS EN EXECUCIÓN
Actualmente, a Xunta de Galicia ten un total de 182 vivendas de promoción pública en execución en Valdecorvos. Deste total, 74 están xa en fase de construción avanzada, e as 108 restantes teñen adxudicada a redacción dos correspondentes proxectos de construción.
Prevén construír outras 118 vivendas de promoción pública en tres parcelas que prevé sexan cedidas polo concello en Valdecorvos e nas unidades de actuación 7 e 15. A redacción dos proxectos será licitada unha vez formalícese a cesión do solo.
Escribe o teu comentario