Compromiso do PPdeG para mellorar a lei estatal de economía social para "garantir" unha sociedade máis xusta

O PPdeG márcase como un dos seus obxectivos para a próxima lexislatura a introdución de melloras no actual anteproxecto de lei integral de impulso da economía social que prepara o Goberno central, para así evitar "os defectos" do texto actual e reforzar o papel das entidades sociais e as empresas.

Segundo informaron os populares galegos, recentemente celebraron unha reunión de traballo na súa sede autonómica para abordar esta cuestión na que estiveron representantes da Asociación de Empresas de Inserción de Galicia (AEIGA), de Arroupa e da Asociación empresarial galega de Centros Especiais de Emprego sen ánimo de lucro (Cegasal).

Así, as súas propostas e inquietudes foron recollidas tanto polos deputados autonómicos como nacionais que se comprometeron a traballar para que a futura lexislación preserve a "tarefa fundamental" que fan estas entidades na transición das persoas vulnerables cara ao mercado de traballo e na consecución dunha sociedade máis xusta, igualitaria e inclusiva.

Así mesmo, na reunión puxeron en valor o proceso de participación e escoita activa da Xunta con todos os axentes implicados na economía social para o deseño da nova lei de cooperativas.