Informe SEPBLAC: Jácome ingresou 850.000 € privados mentres cobraba dedicación exclusiva á alcaldía

O Sepblac cuantifica en 1,02 millóns os ingresos en cinco anos, incluídos 236.000 o soldo como edil e 104.000 as achegas propias. O resto procedería de ingresos por actividades particulares: 850.000 euros procedentes da xestión das súas numerosísimos pisos incluídos - e aquí reside o problema para o político - 424.000 euros que o seu partido, Democracia Ourensá, pagou en concepto de publicidade á súa televisión, Auria TV.
 

A liña argumental de defensa de Jácome sempre foi que é legal que DO destine o diñeiro onde mellor estime oportuno, neste caso unha televisión local da súa propiedade. Até agora as acusacións por este flanco foron arquivadas.

O problema para Jácome xurdiu esta primavera, non por desviar fondos de DO a Auria TV, senón por non solicitar no Concello a compatibilidade que esixe a lei para os alcaldes que, cobrando unha dedicación exclusiva das arcas públicas, queiran compatibilizar o soldo municipal con actividades privadas, que non sexan a mera xestión do seu patrimonio, como poden ser alugueres polos seus numerosísimos pisos.

Ese é o flanco que lle supuxo ao alcalde que a Xustiza lle abra unha investigación por prevaricación, tras unha denuncia dun ex-concelleiro de DO, Telmo Ucha. 

O que fai o informe do Sepblac de hoxe é pór cifras a todo este transvasamento de diñeiro. 

Onde foi o millón de euros que entra nas contas do alcalde? Ademais de 30.000€ nun cheque a favor dun concelleiro, constan pagos de 210.000 euros polo aluguer da licenza de Auria TV á sociedade UTEGA/Localia, que é a titular da concesión administrativa. O problema para Jácome é que hai transferencias de 713.000 “desde esa mesma conta cara a outras particulares súas ou cara ao seu propio patrimonio persoal”, segundo detalla A Rexión.

Jácome: Pero estas historias non estaban arquivadas?

Galiciapress púxose en contacto con Democracia Ourensá para publicar a reacción de Jácome, sen obter contestación do político, quen si se pronunciou a través das súas redes sociais: “Pódese denunciar polo mesmo cada ano? Pero estas historias non estaban arquivadas?”.

O político refírese a que efectivamente as causas por usar o diñeiro público que ingresa DO para Auria TV foron arquivadas. Os xuíces déronlle a razón. 

O seu problema xudicial, con todo, é outro, o de non solicitar a compatibilidade a pesar de que foi advertido, mesmo pola fiscalía, de que debía facelo. 

Case pisos en propiedade 

O outro flanco xudicial que se lle pode abrir ao alcalde cos datos publicados hoxe é o das súas declaracións de transparencia,  que por certo non figuran nas webs do Concello nin da Deputación. 
 

Segundo A Rexión, o político ocultou baixo unha xenérico herdanza nas súas últimas declaracións moitos inmobles urbanos, mesmo antes de recibir a herdanza tras o falecemento da súa nai. Na actualidade tería en propiedade 19. 

Jácome recorreu o auto de acusación ante a Audiencia Provincial.