O PSdeG reclama desbloquear a lei contra os incendios forestais da Xunta

A portavoz de Política Forestal do Grupo Socialista, Carmen Rodríguez Dacosta, presentou no Parlamento unha batería de iniciativas para esixirlle á Xunta que "desbloquee" a tramitación da Lei Galega de Loita Integral contra vos Incendios Forestais.

"Foi anunciada en 2021 e segue gardada nun caixón. O PP prefire propaganda antes que darlle solucións a Galicia. O monte quéimase, as aldeas sofren e a cidadanía queda desprotexida pola súa inacción", criticou a deputada nun audio remitido aos medios este domingo. A formación apunta que a norma está "bloqueada nos despachos da Xunta" desde o fin do proceso de consulta pública, o 7 de xuño de 2023.

Neste contexto, Rodríguez Dacosta censurou a "falta de xestión" nos labores preventivos por parte do Goberno galego, no que considera que "a improvisación substituíu á planificación": "A inacción deixou en evidencia a falta de compromiso do PP coa defensa do territorio e coa seguridade da cidadanía".

A socialista sinalou que o Goberno galego "tampouco fixo caso" ao Plan Forestal de Galicia, que, segundo recolle a deputada, na súa última revisión "alerta" de que a lei tería que ser presentada "como prazo máximo" en 2025.

Así, a socialista esixiu "explicacións e feitos" e pediu ao Executivo galego que "presente xa" a lei. "Está obrigado a cumprir dunha vez coas súas obrigacións en materia de prevención e defensa contra os incendios forestais", esgrimiu. Entre estas "obrigacións" sitúa a presentación "antes de que termine o ano" do proxecto de lei.

Así mesmo, reclamou unha tramitación "transparente e participativa", na que se incorporen as achegas de concellos, comunidades de montes, organizacións profesionais, o mundo académico, colectivos sociais e partidos políticos con representación parlamentaria. Ademais, esixiu incorporar un "calendario vinculante" para aplicar a norma.