A Xunta convocou máis de 180 prazas para bombeiro forestal a 26 de agosto

A cinco días para que termine o mes de agosto, o máis destrutivo no que a incendios se refire desde que hai rexistros, hai en Galicia catro incendios activos e aínda pendentes de controlar. Iso só os activos, pois estabilizados están os incendios de Chandrexa de Queixa e Vilariño, que arrasaron 19.000 hectáreas, o de Oímbra e Xinzo de Limia, tras queimar 17.000 hectáreas, o da Mezquita, na parroquia da Esculqueira. que calcinou 10.000 hectáreas, ou o de Larouco, na parroquia de Seadur, o máis destrutivo da historia recente de Galicia con 30.000 hectáreas destruídas ao seu paso. 

Nesta onda de incendios os medios da Xunta víronse desborados e o Goberno de Galicia tivo que solicitar medios adicionais ao Goberno de España, como o despregamento da UME nas zonas afectadas, un reforzo que logrou frear o peor momento, aparentemente, da crise do lume. Neste contexto, o Diario Oficial de Galicia (#DOG) anunciou onte, martes 26 de agosto, a convocatoria de 327 prazas para bombeiro forestal, condutor e xefe de brigada.

181 PRAZAS DE BOMBEIRO

O anuncio chega cando falta menos dun mes para concluír o verán e nun momento no que moitas voces pediron a dimisión da conselleira de Medio Rural, María José Gómez, pola xestión que fixo a Xunta da vaga de incendios. Tamén os manifestantes que participaron nas mobilizacións convocadas pola plataforma 'Por un monte galego con futuro' o pasado 21 de agosto en preto dunha trintena de localidades galegas pediron o cesamento do presidente autonómico, Alfonso Rueda. 

Este proceso selectivo anunciado polo DOG debullaríase en en 71 prazas para xefe de brigada, sendo tres delas para persoas con discapacidade e 36 para promoción interna. Para condutor son 75 as prazas, tamén tres delas pensadas para persoas con discapacidade recoñecida e 38 para promoción interna.

En canto ás prazas para bombeiro forestal son un total de 181, onde hai que establecer que a metade, 91, son para promoción interna, mentres que existen nove vacantes para candidatos con discapacidade.