O BNG pedirá á Xunta reorientar case 2.000 millóns dos orzamentos e unha política fiscal "xusta"

A portavoz nacional do BNG, Ana Pontón, avanzou que o grupo parlamentario nacionalista pedirá a próxima semana reorientar 1.997 millóns de euros dos orzamentos da Xunta e pór en marcha unha política fiscal "xusta".

Así o trasladou este sábado a líder do Bloque nunha intervención ante os medios de comunicación no marco do Consello Nacional celebrado en Teo.

Segundo Pontón, as propostas do BNG para obter "máis ingresos" a través dunha política fiscal "xusta" terán tres prioridades: servizos públicos e política social, ciencia e sectores produtivos e un modelo enerxético a favor do país e respectuoso co medio ambiente e a xente do rural.

"Temos que contrarrestar a deslealdade con Galicia do Goberno de Rueda reforzando o noso traballo político, tanto na rúa como nas institucións e usar toda a nosa capacidade para evitar que este goberno do PP hipoteque aínda máis o futuro dos galegos", reafirmou.

Nesta liña, Pontón reivindicou que o BNG traballará para "dar alternativas" fronte a un Executivo autonómico que para 2025 "volve presentar uns orzamentos rutineiros, propios dun Goberno que non ten ningún proxecto de futuro, que beneficia aos máis ricos e que anuncia investimentos que son unha farsa porque nunca se executan".

Os únicos que teñen motivos para "aplaudir", sinalou Pontón, son "o lobby eléctrico", que, na súa opinión, "benefíciase da súa barra libre ao espolio eólico, e as multinacionais que se benefician dos millóns de euros que lle quitan ao público para dar negocio ao sector privado".

"Os últimos orzamentos demóstrannos para quen traballa este goberno, uns orzamentos que o PP leva anos utilizando para beneficiar a empresas amigas, con contratos a dedo que suman millóns de euros a empresas vinculadas con altos cargos do PP, como a irmá de Feijóo ou con empresas vinculadas a colaboradores directos de Rueda", subliñou.

"PÁNICO" Á COMISIÓN DE INVESTIGACIÓN
Por iso, sinalou, os populares teñen "pánico" á comisión de investigación impulsada polo BNG. "Tanto teñen que esconder", apuntou Pontón, que "vetaron a comparecencia de Feijóo e, ademais, impoñen un plan de traballo de maneira antidemocrática".

Neste sentido, a líder nacionalista ve "curiosa" a forma de actuar do PP: "O Feijóo que pide transparencia en Madrid aquí escapa do Parlamento".

Para a portavoz do BNG, os populares tentan "boicotear" esta investigación "por terra, mar e aire", pero, avanzou, "non o van a conseguir". "Imos ir até as últimas consecuencias para destapar 15 anos de chanchullos do Partido Popular e imos traballar para sacar á luz todo o que o PP quere tapar", aseverou.