Galicia ábrese a acoller a 26 novos menores migrantes de Canarias e Ceuta

Despois da reunión mantida onte entre as Comunidades Autónomas e o Goberno central, Galicia cifra en menos dunha trintena os menas que podería acoller.

Con todo, a Xunta acusa o Executivo de Pedro Sánchez de impor esta repartición: "O Goberno limítase á inacción, á improvisación e ás imposicións".

A Xunta de Galicia confirma estar disposta a acoller a 26 novos menores migrantes procedentes de Canarias e Ceuta tras participar na Conferencia Sectorial que aborda a situación e onde a conselleira de Política Social e Igualdade, Fabiola García, reivindicou a Galicia como "lugar de acollida".

O Goberno galego confirma así o seu voto a favor da acollida na reunión entre Goberno e comunidades celebrada en Santa Cruz de Tenerife. Para a conselleira, a acollida é unha "cuestión de humanidade".

Con todo, a conselleira, que interveu por videoconferencia acompañada polo director xeral de Familia, Infancia e Dinamización Demográfica, Jacobo Rey, mostrouse moi crítica pola "ausencia" dunha política migratoria por parte do Executivo, "unha competencia do Goberno central que tenta descargar toda responsabilidade nas comunidades autónomas ao tentar impor de forma unilateral unha repartición non negociada con elas".

Ademais, demandou a convocatoria dunha conferencia de presidentes e esixiu financiamento por parte do Goberno para atender aos menores ata que abandonan o sistema de protección, ademais de solicitar garantías para que todas as comunidades autónomas participen na repartición.

Nesta liña, reiterou que, para poder acoller en condicións, é necesario "traballar con previsión, planificación e coordinación, contar cunhas regras de xogo claras e equitativas, iguais para todas as comunidades". "Pero o Goberno limítase á inacción, á improvisación e ás imposicións", afeou.

Fabiola García lamentou que, "fronte ao sentidiño de Galicia e a formulación razoable da maioría das comunidades", o Executivo de Pedro Sánchez "volva facer gala de deslealdade".

Na reunión abordouse tamén a reforma da Lei de Estranxeiría para a repartición de menores migrantes non acompañados, respecto da que afean recibir o texto este martes pola tarde. Afirman que o departamento "non tivo tempo suficiente para o seu estudo", na mesma liña na que se expresaron outras rexións.

De todos os xeitos, matizan, a conferencia sectorial non ten competencias sobre o mesmo, que reside nas Cortes, polo que non será sometido a votación.

FABIOLA GARCÍA EXIGE RECTIFICACIÓN DE SIRA REGO

Estes 26 menores súmanse aos 28 que Galicia aceptou recibir de Canarias en 2023, polos que aínda se atopa á espera e cos que completaba todas as prazas de acollida dispoñibles na actualidade.

Así o sinalan fontes da consellería, que trasladan ademais o malestar da responsable do departamento autonómico ante recentes declaracións da ministra de Infancia, Sira Rego, nas que acusaba a varias comunidades, entre elas Galicia, de non acoller aos menores comprometidos en 2023.

Insisten en que a Xunta acordou no 2023 a chegada de 28 menores que aínda non chegaron desde Canarias debido a que, tal e como recoñeceu o presidente autonómico canario, foron incapaces de tramitar as saídas.

"Nunca por falta de compromiso por parte do goberno galego, desde onde nos puxemos en contacto en reiteradas ocasións para garantir que o noso sistema de apoio ten todo preparado desde hai meses", recalcan.