'Rapants Club' xa está na rúa e nas pistas de baile

Os rapantes xa están de novo na estrada. O grupo máis bailongo e "jamberro" da escena galega volven con 'Rapants Club', o seu novo e esperado cuarto disco, co que os de Muros celebran a compañía brindada polos seus fieis ao longo dos anos, onde se han catapultado até ser unha das bandas máis queridas e escoitadas da comunidade. Sen renunciar ao seu estilo pero sen pechar portas, The Rapants lanza este novo traballo cun gran concerto no horizonte.

BENVIDOS Ao CLUB

Ritmos discotequeros, sintetizadores, letras que che roldan a cabeza durante todo o día...así é este novo disco que incorpora colaboracións de altura como a de Sara Faro, unha das Fillas de Cassandra, Antía Ameixeiras, de Caamaño&Ameixeiras, ou Joe Crepúsculo. 

A través dunha ducia de cancións, xa dispoñibles nas principais plataformas, os muradáns, xa sexa en castelán ou o seu galego con gheada, deixan entrever todas as influencias que os levaron a ser recoñecidos polos seus ritmos discotequeros, pero tamén por ser capaces de pór en palabras sentimentos complexos ou sensacións universais, algo que xa puidemos ver en 'Viaxei' e 'Non sei como', adiantos desta nova aventura. 

Os rapantes non teñen teito nin meta, pero si unha primeira pedra de toque: sábado 28 de marzo no Multiusos Fontes do Sar, que proxecta estar cheo até a bandeira despois de colgar o cartel de 'Sold Out' e, ante as solicitudes, ampliar un pouquiño máis o aforamento coas últimas entradas en despacho de billetes, despois d evender xa máis de 5.200 boletos. Unha gran festa en Santiago para dar o pistoletazo de saída e unir ao Rapants Club.