Segismundo García, dono de Sargadelos, volve paralizar a planta en Cervo tras unha inspección

O dono de Sargadelos, Segismundo García, volveu a ordenar que pare a produción na histórica planta de cerámica de Cervo (Lugo), tras unha nova inspección de Traballo ás instalacións, segundo confirman varias fontes consultadas por Europa Press.
 

A visita de tres persoas por parte de inspección era "rutineira" e "niso quedaran" en relación ao expediente aberto a comezos de ano, segundo sinala, en declaracións a Europa Press, a alcaldesa de Cervo, Dores García.

Precisamente, a rexedora atopábase na mañá deste xoves alí por outras cuestións, e topouse cos inspectores, que lle comunicaron que a visita se producía "seis meses despois" do pulso protagonizado por Segismundo García no principio do ano.
 

A alcaldesa tamén puido falar con algunha traballadora, e co propietario da fábrica, quen, nas súas palabras, comunicoulle "que pechaba a planta, a produción, e parábaa, para preservar a saúde dos traballadores".
 

Así as cousas, Segismundo García mandou abandonar a fábrica á parte do persoal encargado da produción e quedaron dentro, como meses atrás, os traballadores de oficina e mantemento.

Ás portas da factoría, a sensación é de 'déjà vu' e "de que isto é unha tomadura de pelo", segundo destaca en declaracións a Europa Press o portavoz da CIG Xorxe Caldeiro, quen lembra o sucedido no principio do ano.

Naquel momento, o pulso que mantivo o propietario de Sargadelos coa Inspección saldouse con tres despedimentos e dous prazos: até despois do verán para mellorar a seguridade e algo máis para obras que afectasen o edificio, catalogado como ben de interese cultural (BIC).
 

Entón, Traballo abrira un expediente a Sargadelos despois de detectar que dúas traballadoras desenvolveron silicoses nesta emblemática fábrica de cerámica da Mariña de Lugo. A empresa estaba obrigada a facer 36 reformas para poder facer seguros os postos de traballo.

Agora, os empregados de produción volven mostrarse "incrédulos, expectantes, encabuxados e desesperados", en palabras do representante da CIG, que este xoves se desprazou até a factoría para interesar pola situación e os afectados. Segundo indica, Segismundo García abandonou o lugar despois da orde de peche e "non hai explicacións".