Stellantis abusa dos empregados e Inspección de Traballo "le o xornal baixo unha antuca", satiriza a CUT

A protesta da forza sindical tivo lugar ante a delegación de Inspección de Traballo en Vigo, á que acusa de abandono de funcións e de poñerse sempre ao lado "dos fortes, da empresa". 

Satirizando a indefensión que senten, os manifestantes marcharon baixo o lema 'Menos cadeira de brazos e máis implicación' para demandar á Inspección máis rigorosidade. 

Baixo o lema 'Menos cadeira de brazos e máis implicación', a CUT convocou este xoves unha concentración ante a Inspección de Traballo en Vigo, para denunciar o seu "proteccionismo" cara á planta de Stellantis e "a pouca implicación" na defensa das persoas traballadoras.

Segundo informou o sindicato, este organismo non só parece demostrar "sensibilidade" cara aos intereses da empresa, senón que demostra pouca implicación no "control e aplicación da suposta nova reforma laboral".

REUNIÓN CO XEFE DE SERVIZO

No marco desta concentración, a delegacion de CUT entregou un escrito na Inspección para solicitar unha reunión co xefe do servizo na provincia de Pontevedra, José María Casas de Ron.

Así mesmo, o sindicato avanzou que solicitará tamén unha reunión coa directora xeral da Inspección de Traballo a nivel nacional, Carmen Colado, para trasladarlle as súas "inquietudes" sobre o que ocorre na factoría viguesa, e advertiu de que, en caso do organismo "non cumpra coas súas funcións", non descarta "outra vía de denuncia".