Santiago quere tratar o Plan Especial con veciños da cidade histórica o 10 de novembro

O Concello de Santiago convocou para o próximo 10 de novembro unha reunión coas asociacións veciñais da cidade histórica para abordar a nova regulación de usos do Plan Especial.

Así, informan de que o departamento de Urbanismo enviou a todas as persoas titulares de inmobles no ámbito do PE-1 unha comunicación oficial para pór no seu coñecemento a aprobación inicial desta modificación puntual e o correspondente trámite de exposición pública.

Ademais disto, o propio concelleiro, Iago Lestegás, acompañado de persoal técnico, fará unha explicación para aclarar calquera dúbida que as directivas das asociacións veciñais do ámbito poidan trasladar sobre estes cambios.

Toda a documentación e información georreferenciada está dispoñible no Xeoportal do Concello de Santiago. Tamén está exposta en formato físico na sede de Urbanismo (Casas Reais, 8).

Lembran que a modificación puntual da regulación de usos do Plan especial de protección e rehabilitación da cidade histórica, aprobada inicialmente en xuño, converte a Santiago en "pioneiro" na protección do comercio de proximidade.

Esta reforma ten como obxectivo "manter e reforzar o uso residencial característico da cidade histórica, promover o mantemento do comercio de proximidade, facilitar a implantación de novos usos dinamizadores da cidade histórica e garantir o equilibrio entre usos orientados a residentes e orientados a turistas".

Ademais, co obxectivo de facilitar a adaptación do parque residencial existente ás características dos fogares actuais, introduce cambios relativos á agrupación e división de vivendas, que xa estaba permitida no Plan especial cunhas condicións máis restritivas que se modifican.