A débeda do Goberno coa Xunta impide máis axudas a empresas da discapacidade, asegura Diego Calvo

"Unha situación límite". Así definen o escenario actual desde a Federación Fademga Plena Inclusión Galicia (FADEMGA) sobre un sector que xa lanzou varias bengalas de axuda á Xunta, á que a Asociación Empresarial para a Discapacidade Intelectual e do Desenvolvemento de Galicia (AEDIGAL) criticou recentemente por, aseguran, incumprir os concertos subscritos ao non actualizar os prezos para cubrir os custos do servizo que prestan, fundamental para moitas familias. Ante esta situación, a patronal advirte que cunhas axudas tan baixas, non quedará outra que asumir o peche de centros, pondo á Xunta de Galicia, e máis concretamente á Consellería de Política Social, nun compromiso moi serio.

DÉBEDA DO GOBERNO DE ESPAÑA?

Ao paso destas advertencias, e con motivo das preguntas de Galiciapress, tivo que saír o conselleiro de Presidencia, Diego Calvo, na rolda de prensa posterior á celebración ao Consello da Xunta, onde asumiu as responsabilidades dun Alfonso Rueda ausente por vacacións.

"En todos os contratos nos que a Xunta axuda a financiar sempre hai actualizacións que se van facendo na medida das nosas posibilidades", sostén Calvo sobre unha Consellería onde "tentamos atender ás necesidades que teñen as distintas asociacións que prestan estes servizos, ás que recoñecemos o seu labor".
 

"Seguro que a Consellería de Política Social vai tentar paliar a situación na medida das súas posibilidades", aventurou Calvo, que aproveitou a ocasión para lanzar un dardo ao Goberno de España con motivo da Lei de Dependencia, aseverando que se lle debe á Xunta o crédito de 2.500 millóns de euros "que nos deben a día de hoxe e cos que, estou seguro, poderiamos resolver moitas das situacións que nos podemos atopar neste momento non só neste tipo de entidades, senón noutro tipo de servizos".