O Eixo Atlántico crece coa incorporación de Vilalba e Betanzos á organización

Despois de tres décadas de traballo, de alianzas e de éxitos, o Eixo Atlántico do Noroeste Peninsular segue crecendo e incorporando a máis municipios dentro deste ente transfronteirizo. A organización da Eurorrexión Galicia-Norte de Portugal está a piques de celebrar o seu XXXIII Asemblea Xeral en Viana do Castelo e será unha data na que cristalizará a adhesión de Vilalba e Betanzos á entidade.

DÚAS NOVAS "FICHAXES"

Desta maneira, serán xa 40 as cidades que pertencen ao Eixo, da que tamén forman parte dúas deputacións. En Viana, que este ano será tamén Capital da Cultura do Eixo, pasarán a integrar por fin este colectivo co liderado da socialistas Marta Rouco e María Barral á fronte dos seus gobernos municipais. "Esta incorporación reforza o camiño cara á igualdade de xénero co incremento da presenza de mulleres no liderado da política local", abundan desde o Eixo. 

No acto tamén se ratificará o orzamento para este 2025, que superará os 5 millóns de euros e que irán destinados, entre outras cousas, a avanzar nos distintos proxectos de carácter europeo que o Eixo está a desenvolver ou que se atopan en vías de aprobación. "Este fluxo constante de recursos novos, que se suman aos propios da organización, permitirá reforzar a resiliencia das cidades e a sustentabilidade do territorio de Galicia-Norte de Portugal, Eurorrexión do Eixo Atlántico", detallan.

CULTURA E HISTORIA

En Viana do Castelo terán lugar debates sbre como afrontar os desafíos que se presentan aos municipios do Eixo no marco da cerimonia de apertura da Capital da Cultura do Eixo 2025, que terá lugar o 17 de febreiro ás 20:30 horas no Centro Cultural de Viana, coa dirección de Daniel Pereira Cristo sobre o espectáculo multidisciplinar que mesturará danza, voz e música nun concerto que contará coa dirección artística e musical de Hélder Costa.
 

Ademais, tamén suporá a apertura da exposición 'Historia do Eixo Atlántico', no Passeio dás Mordomas dá Romaria, en Viana do Castelo. A súa inauguración será o mesmo luns 17 de febreiro, ás 17 horas, coa asistencia de Luís Nobre, alcalde de Viana e presidente do Eixo, e Xoán Vázquez Mao, secretario xeral do Eixo.